
کاروان گەزنەیی، گوتەبێژی یەکێتیی نیشتمانیی کوردستان رایگەیاند، لەدەستدانی سەرۆک مام جەلال خەسارەتێکی گەورە بوو، دەشڵێت، دوای لەدەستدانی مام جەلال، ئێستا تێدەگەین حیکەمەت وەسێت و میراتی ئەو چەندە گەورەبوون بۆ چارەسەرکردنی کێشەکان.
کاروان گەزنەیی لە کۆنفرانسێکی رۆژنامەوانیدا گوتی، ئێستا سەرۆکی یەکێتی بە وەسێت و میراتەکانی مام جەلال لەساڵی 2025 هەوڵی چارەسەرکردنی کێشەکانی نێوان هەولێر و بەغدادی داوە.
هەروەها گوتەبێژی یەکێتیی نیشتمانیی کوردستان لەبارەی دەستپێکردنی بانگەشە و دیدی حیزبەکەی بۆ پرۆسەی هەڵبژاردنی رۆژی 11ـی 11ـی ئەمساڵی ئەنجوومەنی نوێنەرانی عێراق، هیوایخواست، لەم ماوەیەدا بانگەشەیەکی ئارام بەڕێوەبچێت.
کاروان گەزنەیی لەبارەی هەوڵەکان بۆ پێکهێنانی کابینەی نوێی حکومەتی هەرێمی کوردستان گوتی، "لە سەروبەندی پێکهێنانی حکومەتداین" و هەروەها "سوورین لەسەر جێکردنەوەی بەڵێنەکانی هەڵبژاردن لە پێکهێنانی حکومەتدا"
کاروان گەزنەیی راشیگەیاند: یەکێتی بەغداد وەکو قووڵایی ستراتیژی بۆ چارەسەرکردنی کێشەکان سەیر دەکات.
قسەکانی گەزنەیی لەکاتێکدان، ئەمڕۆ هشت ساڵ بەسەر کۆچی دوایی جەلال تاڵەبانی، دامەزرێنەری یەکێتی و یەکەم سەرۆککۆماری کوردی عێراق تێپەڕدەبێت.