Puxteya Nûçeyê:

• Mehmet Uçum got Ocalan dê di komîsyona "Bêçekkirin û Koordînasyona Stratejîk de cih bigire, lê çavkaniyên DEM Partiyê dibêjin "hêj ne zelal e."
• Li gorî çavkaniyan, nîqaşên li ser cihgirtina Ocalan di komisyonê de û pênasekirina rola wî ya di pêvajoyê de berdewam dikin.
• DEM Partî pêvajoyê wekî du aliyan, ango "bêçekkirin" û "siyasîbûn" pênase dike.

Şêwirmendê Receb Tayyîp Erdogan, Mehmet Uçum gotibû, Ocalan dê rasterast di vê komisyonê de cih bigire. Lê belê, çavkaniyên DEM Partiyê destnîşan dikin ku ev daxuyanî nayê wateya lihevkirineke dawî ya di navbera aliyan de. Hêj nayê zanîn ku daxuyaniya Uçum dispêre kîjan agahiyê.

Pênaseya rola Ocalan: Çavkaniyekî derbarê rewşa Ocalan de wiha got: "Hêj rewşeke zelal nîne. Hevdîtinên li ser pênasekirina rola wî ya di pêvajoyê de berdewam dikin."

Du sernavên cuda yên pêvajoyê: Li gorî çavkaniyên DEM Partiyê, bingeha nîqaşên heyî li ser wê yekê ye ka pêvajo dê tenê li ser sernavê bêçekkirinê bimeşe yan na. Çavkanî pêvajoyê di ser du sernavên ji hev cuda lê bi hev ve girêdayî re şîrove dikin: Bêçekkirin û Siyasîbûn.

• Bêçekkirin: Pêvajoya danîna çekan û mekanizmayên girêdayî wê dihewîne.
• Siyasîbûn: Pêvajoyê birina ser zemîneke siyasî û hiqûqî û gavên ku dê piştî bêçekkirinê bên avêtin vedihewîne.

Statuya Ocalan: Çavkaniyên DEM Partiyê diyar dikin ku tenê bi sernavê bêçekkirinê sînordarkirina rola Ocalan, hemû nîqaşê ranagire. Ji ber vê yekê, divê rola Ocalan bi berçavgirtina her du aliyên pêvajoyê bê pênasekirin. Di vê çarçoveyê de, hevdîtin tenê li ser cihgirtina di komisyoneke taybet de nînin. Pirseke din a girîng jî ew e ka Ocalan dê bi kîjan nasnavî, di kîjan çarçoveyê de û bi kîjan mekanizmayê rolekê bigire ser xwe.

Pêşniyara Devlet Bahçelî: Nîqaşa statuya Ocalan bi pêşniyara Serokê Giştî yê MHPyê Devlet Bahçelî ya ku berê wekî "Pêvajoya Aştiyê û Koordinatoriya siyasîbûnê" anîbû ziman, daxe rojevê.

Bahçeli di 16ê Îlonê de ji rojnamevan Ceyhun Bozkurt re ragihandibû ku ev pêşniyara wî hêj derbasdar e. Wî di heman daxuyaniyê de diyar kiribû ku li Îmraliyê ji bo Öcalan xaniyekî 250 metrekare hatiye çêkirin, li wir ê hevdîtin bên kirin û peyam bên guhartin; her weha dema hewce bike ê rênasî ji bo hevdîtina bi rojnamevanan re jî bê dayîn.

Balkişandina Bahçelî ya li ser siyasîbûnê, wekî qada nîqaşê ya DEM Partiyê ye ku pêvajoyê di du sernavan de pênase dike. Lê belê, ev rewş nayê wateya ku di navbera aliyan de li ser rola Ocalan lihevkirin pêk hatiye.

Ji bo rola Ocalan kîjan model?

Li gorî agahiyên ku çavkaniyên DEM Partiyê dane, di qonaxa heyî de du nêzîkatiyên bingehîn hene:

1. Nêzîkatiya yekem: Pêşbînî dike ku Ocalan rasterast di nav Jêrkomîsyona Bêçekkirin û Koordînasyona Stratejîk de cih bigire.
2. Nêzîkatiya duyem: Diparêze ku rola Ocalan tenê bi qada wezifeya vê komisyonê re sînordar nemîne û çarçoveyeke berfireh ku aliyê "siyasîbûnê" jî li xwe digire, bê diyarkirin.

Hevdîtinên Berdewam: Ji ber vê yekê, biryara li ser cihgirtina di komisyonê de, ji nîqaşa giştî ya pênasekirina rola Ocalan a di pêvajoyê de serbixwe nîne. Çavkaniyên DEM Partiyê didin zanîn ku bi taybetî gavên siyasî û hiqûqî yên piştî bêçekkirinê dê di ser kîjan mekanizmayê re bên meşandin jî, di nav sernavên hevdîtinan de ne.

Lewra, ew xala ku di vê qonaxê de hatiye zelalkirin ne ew e ku wê Ocalan beşek ji komîsyonê be yan na; tiştê teqez ew e ku hevdîtinên li ser pênasekirina rola Ocalan a bi her du aliyên "bêçekkirin" û "siyasîbûnê" re berdewam dikin.