پووختەى هەواڵەکە:

• شیعەکان چەندین بۆنەى تایبەتیان بە لە دایکبوون و کۆچى دوایى نەوەکانى پێغەمبەرى ئیسلام (د.خ) هەیە.

• یادکردنەوەى فاتیمەى کچى پێغەمبەرى ئیسلام یەکێکە لە بۆنەکانیان.

• ساڵانە بەبۆنەى بەشێک لە یادەکانەوە لە عێراق پشوو ڕادەگەیێنرێت.

حەوت پارێزگای باشووری عێراق، دەوامی فەرمانگە خزمەتگوزارییەکان، خوێندنگە و زانکۆکانیان بۆ ڕۆژی یەکشەممە ڕاگرت، ئەوەش بەبۆنەی ساڵیادی کۆچی دوایی فاتیمەی کچی پێغەمبەری ئیسلام.

ئەو پارێزگایانەی پشوویان ڕاگەیاندووە:

• بەسرە، زیقار، بابل، دیوانییە، واست، نەجەف و کەربەلا.

• ڕاگرتنی دەوامی فەرمانگەکان لەو پارێزگایانە، فەرمانگەی تەندروستی و هێزە ئەمنییەکان ناگرێتەوە.

موسڵمانانی شیعە مەزهەب، ساڵانە یادی فاتیمە دەکەنەوە، کە ناکۆکی هەیە لەسەر وادەی کۆچی دواییەکەى لەنێوان ڕۆژانی 3ـی جەمادی یەکەم و 3ـی جەمادی دووەمە.

لە پارێزگای نەجەف و لە نزیک مەزاری عەلی کوڕی ئەبوتاڵیب کە دەکاتە هاوسەری فاتیمە، لە کەربەلاش لە مەزاری حسێن کوڕی عەلی، کە دەکاتە کوڕەزای پێغەمبەری ئیسلام و کوڕی فاتیمە، یادەکە دەکەنەوە.