پووختەى دیدارەکە:

• تێکدان و پیسکردنی ژینگە، ئاو، هەوا و خاک مەترسیی تووشبوون بە شێرپەنجە زیاد دەکات.

• ئۆکتۆبەر وەکو مانگی هۆشیاریی شێرپەنجەی مەمک لە جیهاندا تۆمار کراوە.

  ---

دێسکی تەندروستیی کەناڵ8، دیمانەیەکی تایبەتی لەگەڵ د. نەریمان عەزیز، پزیشکی پسپۆڕی نەشتەرگەریی مەمک، سەبارەت بە هۆشیاریی شێرپەنجەی مەمک ئەنجام داوە.

تەواوى گوتەکانى د.نەریمان عەزیز:

• خۆپاراستن لە تووشبوون بە شێرپەنجەی مەمک زۆر باشترە لە چارەسەرکردن.

• خۆپاراستن لە تووشبوون بە شێرپەنجەی مەمک تاڕادەیەک ڕوون نییە، چونکە بەتەواوی هۆکاری تووشبوون دیاری نەکراوە.

• باوترین ڕێگاکانی خۆپاراستن بریتین لە کێشی جەستەی تەندروست، دوورکەوتنەوە لە جگەرەکێشان.

• تێکدان و پیسکردنی ژینگە، ئاو، هەوا و خاک مەترسیی تووشبوون بە شێرپەنجە زیاد دەکات.

• دەستکاریکردنی بۆماوەیی خواردن یەکێکی دیکەیە لە هۆکارەکانی تووشبوون بە شێرپەنجە.

• یەکێک لە هەنگاوە گرنگەکانی کۆنتڕۆڵکردنی شێرپەنجە دەستنیشانکردنی شێرپەنجەکەیە لە قۆناغە سەرەتاییەکاندا، چونکە چارەسەرکردنی شێرپەنجە لە قۆناغە پێشکەوتووەکاندا تاوەکو ڕادەیەک ئەستەمترە.

• بەشێک لە خێزانەکان بۆماوەیی تووشبوون بە شێرپەنجەی بۆماوەییان نییە و بەشێکیشیان بۆماوەیی تووشبوونیان بە شێرپەنجەی مەمک هەیە.

• ئەنجامدانی پشکنینی پێشوەختە مانای ئەوە نییە هەمیشە ئەنجامەکە پاکبێت، بەڵکو مانای ئەوەیە ئەگەر ئەنجامی پشکنینەکە ئەرێنی بوو و کەسەکە تووشی شێرپەنجە بوو، لە قۆناغە سەرەتاییەکاندا دەستنیشان بکرێت و زوو چارەسەر بکرێت.

• لە ڕووی باری دەروونی و جەستەییەوە کاریگەرییە نەخوازراوەکانی شێرپەنجە لەسەر تەندروستیی چارەخواز کەم دەبێتەوە ئەگەر شێرپەنجەکە لە قۆناغە سەرەتاییەکاندا دەستنیشان بکرێت.

• چارسەرە باوەکانی شێرپەنجەی مەمک بریتین لە: نەشتەرگەری، چارەسەری کیمیایی، چارەسەری بەرگری.

• ئەنجامدانی نەشتەرگەری لابردنی گرێکانی شێرپەنجەی مەمک لە ئێستادا پێشکەوتووترە و پێویست ناکات تەواوی مەمکەکە لاببرێت.

• وەرگرتنی نموونەی شانەی شێرپەنجەیی مەمک و ئەنجامدانی نەشتەرگەری لابردنی گرێکانی شێرپەنجەی مەمک، بەهیچ شێوەیەک نابێتەهۆی زیادبوون و بڵاوبوونەوەی گرێ شێرپەنجەییەکان.

• لەبری ئەوەی شێرپەنجە کۆتایی بە تۆ بێنێت، تۆ بەهێزبە و کۆتایی بە شێرپەنجەکە بێنە.