پووختەى هەواڵەکە

• تورکیا و بولگاریا و ڕۆمانیا سەرکۆنەی هێرشەکان لە دەریای ڕەش دەکەن.

• هەرسێ وڵات داوا دەکەن ڕووسیا و ئۆکرانیا خۆیان لە هێرشکردنە سەر کەشتییەکان بەدوور بگرن.

  ---

پاش کۆبوونەوەیان لە سۆفیای پایتەختی بولگاریا، هەریەک لە یاشار گولەر، وەزیری بەرگریی تورکیا، دیمیتار ستۆیانۆڤ، وەزیری بەرگریی بولگاریا و ستێفان رادۆ، وەزیری بەرگریی ڕۆمانیا ڕاگەیێنراوێکی هاوبەشیان بڵاوکردەوە و تیایدا بە تووندی سەرکۆنەی هێرشەکانی سەر کەشتییە بازرگانییەکانیان لە دەریای ڕەش کرد.

راگەیێنراوەکە:

• دەریای ڕەش ڕێڕەوێکی گرنگ و پڕبایەخە لە بازرگانیی نێودەوڵەتیدا.

• لە ڕووی دابینکردنی دانەوێڵە، پەین و وزە.

• جەخت لە گرنگیی ئازادیی کەشتیوانی و ئاسایشی دەریاوانی دەکەینەوە.

• پەککەوتنی هاتوچۆی دەریایی؛ مەترسی بۆ سەر ئاسایشی خۆراک و وزە، بە تایبەتیش ناوچە هەستیارەکانی وەک ئەفریقا، ڕۆژهەڵاتی ناوەڕاست و ئاسیا دروست دەکات.

تورکیا و بولگاریا و ڕۆمانیا بێ ناوهێنان داوایان لە هەریەک لە ئۆکرانیا و ڕووسیا کردووە، هێرش نەکەنە سەر کەشتییە بازرگانییەکان بۆ پاراستنی ئاسایشی دەریای ڕەش، داوایان لێدەکەن پابەندی یاسا نێودەوڵەتییەکان بن.

لە راگەیێنراوەکەدا ئاماژە بەوەشکراوە، بە مەبەستی پشتیوانیکردن لە ئاسایش و سەقامگیری لە دەریای ڕەش، هەرسێ وڵات بەردەوام دەبن لە بەهێزکردنی هاوکاری و هەماهەنگیی نێوان سوپاکانیان و بڕیاریشیان داوە خولی داهاتووی ڕاوێژەکان لە ئەنقەرە و بوخارست ئەنجام بدرێت.

زانیاریی زیاتر بۆ تۆ:

بلومبێرگ: ئەنقەرە جموجوڵی کەشتیوانی بۆ دەریای ڕەش سنووردار دەکات