لە 25 پۆلی قوتابخانەیەکی ئیستانبوڵ وانەی کوردی دەخوێنرێت
پووختەى هەواڵ
لە ئیستانبوڵ قوتابییە تورکەکان وانەی کوردی دەخوێنن.
یەکەمجارە لە ئیستانبوڵ وانەی بژاردەی کوردی دەخوێنرێت.
لە ساڵی 2012ـەوە وانەی بژاردەی کوردی لە باکوورى کوردستان دەخوێنرێت.
پارێزەر سوپحی ئۆزگەن، سەرۆک و دامەزرێنەری ڕێکخراوی بزووتنەوەی زمانی کورد "هەزکورد"، بە کەناڵ8ـی ڕاگەیاند، بۆ یەکەمجار لە مێژوودا، ئێستا لە 25 پۆلی قوتابخانەیەکی شارۆچکەی ئەسەنیورتی ئیستانبوڵ، وانەی بژاردەی کوردی دەخوێنرێت.
ئۆزگەن، پارێزەرە و چەند ساڵێکە لە باکووری کوردستان و تورکیا کار بۆ زمانی کوردی دەکات:
ئێستا لەو قوتابخانەیەی ئیستانبوڵ 250 قوتابی وانەی بژاردەی کوردی دەخوێنن.
لەکاتێکدایە ساڵی پار، تەنیا 75 قوتابی وانەکەیان دەخوێند.
چوار یەکی ئەو قوتابییانەی وانەی بژاردەی کوردی دەخوێنن، تورکن.
ئەمساڵ لە ئیستانبوڵ هەزار قوتابی داوای خوێندنی وانەی کوردییان کردووە.
بەڵام بەهۆی نەبوونی مامۆستای زمانی کوردی، ناتوانن وانەکە بخوێنن.
ئەگەر هەوڵەکان یەکبخرێن، دەکرێت ساڵی داهاتوو تەنیا لە ئیستانبوڵ، 100 هەزار قوتابی داوای خوێندنی وانەی کوردی بکەن.
شارۆچکەی ئەسەنیورت گەورەترین ناوچەی ئیستانبوڵە و نزیکەی ملیۆنێک کەسی تێدا دەژی، بەشێکی دیاری خەڵکی ناوچەکە، ئەو کوردانەن لە باکووری کوردستانەوە کۆچیان کردووە.
لە هەر قوتابخانەیەکدا 10 قوتابی داوای خوێندنی وانەکە بکەن، پێویستە پۆلێکیان بۆ جیابکرێتەوە و هەفتانە دوو کاتژمێر وانەکە بخوێنن.
