پووختەى هەواڵ

• تیمى وەزارى یەکێتى بەشداری لە کۆبوونەوەکە نەکرد.

• ئەنجوومەنى وەزیرانى کاربەڕێکەرى پارتى داواى بەدەمەوەچوون بۆ بانگەوازەکەى بارزانى دەکات.

• ئەنجوومەنى وەزیرانى کاربەڕێکەرى پارتى لەبارەى کەمیى کارەبا، گرانیى غاز و نەوت چارەسەرى نەخستووەتەڕوو.

• لە کۆبوونەوەکەدا باسى لافاوەکەى هەولێر نەکراوە.

ئەمڕۆ چوارشەممە ئەنجوومەنى وەزیرانى کاربەڕێکەرى پارتى بە سەرپەرشتیى مەسروور بارزانى کۆبووەوە و چەند پرسێکى تاوتوێ کرد، لەوانە "بانگەوازی مەسعود بارزانی"، ئەنجامی سەردانی شاندی پارتى بەناوى حکومەتەوە بۆ بەغداد و هێرشی "تیرۆریستی" سەر کێڵگەی گازی کۆرمۆر.

ڕاگەیێنراوى ئەنجوومەنى وەزیرانى کاربەڕێکەرى پارتى:

• پێشوازیی و پشتیوانی لە بانگەوازی سەرۆک مەسعود بارزانی دەکەین سەبارەت بە کۆبوونەوەی لایەنە سیاسییەکان و چارەسەرکردنی کێشەکان.

• داوا لە هاوکارانمان، لە تیمی وەزاریی یەکێتیی نیشتمانیی کوردستان دەکەین کە بگەڕێنەوە بۆ کۆبوونەوەکانی ئەنجوومەنى وەزیران و درێژە بە کارکردن و دەوامکردنیان لە حکومەتی هەرێمی کوردستان بدەن.

• هەر سەرنج و تێبینی و پێشنیازێکیشیان هەیە، پێویستە لە چوارچێوەی کۆبوونەوەکانی ئەنجوومەنى وەزیران، گفتوگۆیان لەبارەوە بکرێت و چارەسەر بکرێن.

مەسروور بارزانى لەبارەى سەردانەکەى بۆ بەغداد:

جەختم لە پێویستیی ڕێزگرتن لە سیستمی فیدراڵیی عێراق و قەوارەی دەستووریی هەرێمی کوردستان و دابینکردنی شایستە داراییەکان و بەشەبودجەی هەرێمی کوردستان لە بودجەی گشتیی عێراق بەشێوەیەکی دادپەروەرانە كردووە.

ئەنجوومەنى وەزیرانى کاربەڕێکەرى پارتى لە بارەى دانوستانەکان:

• گفتوگۆ و دانوستانەکانی بودجەی ساڵی 2027 بەردەوام بن.

• بۆ گەیشتن بە ڕێککەوتنێکی بنەڕەتی و کۆتایی و دادپەروەرانە، لەبارەی جێگیرکردنی مووچە و شایستە دارایییەکان و بەشەبودجەی هەرێمی کوردستان لە بودجەی گشتیی فیدراڵدا.

هێرشەکەى سەر کۆرمۆر:

• وەزیری کارەبا و سامانە سروشتییەکان بە وەکالەت، لەبارەی لێکەوتەکانی هێرشی تیرۆریستی سەر کێڵگەی غازی کۆرمۆر ڕاپۆرتێکى پێشکەش کرد.

• لە ڕێگەی وێستگەکانی بەرهەمهێنانی کارەبا کە بە نەوتی ڕەش و دیزل و کارۆئاوی و فلێر گاز کار دەکەن، بەشێک لە کەمبوونەوەى کارەبا قەرەبوو دەکرێتەوە.

• لیژنە ئەمنی هاوبەش لەنێوان حکومەتی فیدراڵ و حکومەتی کاربەڕێکەرى پارتى پێکهێنراوە لێکۆڵینەوەکان بەردەوامن.

• ئەم هێرشە ئامانجی تێکدانی ژێرخانی ئابووری و وزەی هەرێمی کوردستان و عێراقە.

لە پێنجشەممە 5ـى تشرینى دووەمەوە بافڵ جەلال تاڵەبانى بڕیارى کشانەوەى یەکێتى لە کابینەى نۆیەم داوە، ئەمە یەکەم کۆبوونەوەى ئەنجوومەنى وەزیرانى کاربەڕێکەرى پارتییە بەبێ تیمى وەزارى یەکێتى.

زانیاریى زیاتر بۆ تۆ:

کەناڵ8 ناوەڕۆکى کۆبوونەوەى تیمى یەکێتى لە حکومەت ئاشکرا دەکات

سەڵاحەدین بەهادین: پەرلەمانی لەتبوو نەبوونی باشترە

عەلی باپیر: دەستپێشخەرییەکەی سەرۆکی پارتی ئەگەر پێشتر بووایە باشتر دەبوو