وەرزى بڕینى مەرەزەیە لە سەردەشتى ڕۆژهەڵاتى کوردستان.
ئەمساڵ بەرهەمی برنج لە چاو ساڵانی ڕابردوو لە شاری سەردەشت زیادیکردوە.
5 بۆ 6 ساڵە چاندنى برنج لە سەردەشت زیاتر پەرەى پێدەدرێت.
ئێران ساڵانە زیاتر لە 3 ملیۆن تۆن برنجی بۆ بەکارهێنانی ناوخۆ پێویستە.
دەشتەکانی مامەزینی، نزیک گوندی نەڵاسن لە شاری سەردەشتی ڕۆژهەڵاتی کوردستان، جووتیاران و خاوەن زەوییەکانی گوندەکە سەرقاڵی بڕینى مەرەزەی ئەمساڵیانن.
چاندنی چەڵتوک پێنج بۆ شەش ساڵە لەم ناوچەیە دەستیپێکردووە.
جووتیاران لە بەرهەمی ئەمساڵیان ڕازین.
بنەتۆوى چەڵتوک لە شاری شیراز و شارەکانی باکووری وڵاتەکەوە دەهێنن.
تێچووی سەرەتایی چاندنی چەڵتوک وەک ساڵانی ڕابردوو نییە.
بە هۆی گرانی و خراپیی دۆخی ئابووری، پارەی ئامێر و کۆمپانیاکان خەرجییەکەی چەند بەرامبەر بووە.
قازانجیشی لە چاو زەحمەتییەکانی کەمترە.
ساڵی ڕابردوو تێچووی سەرەتایی چاندنى چەڵتوک بۆ هێکتارێک لە زەوییەکانی مامەزینە بە18 ملیۆن تمەن بوە.
ئەمساڵ بۆ هەر هێکتارێک نزیکەی 50 ملیۆن تمەن لە جووتیاران وەرگیراوە.
نەبوونی ئاش لە ناوچەکە وایکردووە جوتیاران بە ناچاری چەڵتوکەکەیان بنێرنە شارەکانی دیکە و بەرهەمەکەیان بکەنە بە برنج.
بڕینى مەرەزە لە زەوییەکانی مامەزینەی سەردەشت لە سەرەتایی پایز دەستپێدەکات و بۆ ماوەی یەک مانگ بەردەوام دەبێت.
بە گوێرەی وەزارەتی کشتوکاڵی ئێرانیش، پێویستیی ناوخۆی ئێران ساڵانە نزیکەی 3 بۆ 3.2 ملیۆن تۆنە، بەرهەمی ناوخۆش لە نێوان 2 بۆ 2.2 ملیۆن تۆندایە، بۆیە ساڵانە نزیکەی یەک ملیۆن بۆ یەک ملیۆن و 100 هەزار تۆن برنج هاوردە دەکرێت.
