هەفتەیەکە حەوت گەڕەکى هەولێر بێ کارەبان
پووختەى هەواڵەکە:
لە 19ـى مانگەوە کێشە لە وێستگەى کارەباى نووسەران دروستبووە.
23ـى مانگ کێشەکە چارەسەر کرا و بۆ ماوەیەکى کەم کارەبا ئاسایى بووەوە.
ئەمڕۆ ئەمڕۆ جارێکى دیکە کێشەى تەکنیکى ڕوویدا و گەڕەکەکان بێ کارەبا بوونەوە.
ژمارەیەک هاونیشتمانى لە گەڕەکى نووسەرانى هەولێرەوە پەیوەندییان بە کەناڵ8ـەوە کرد و دیمەنى ڤیدیۆى گەڕەکەکەیان نارد، کە نە کارەباى نیشتمانى هەیە نە مۆلیدە، ئەوەش بەهۆى ئەوەى وێستگەى سەرەکیى کارەباى گەڕەکەکەیان نزیکەى هەفتەیەک کێشەى تێدایە.
کێشەکە کەى سەریهەڵدا؟
لە 19ـی مانگ، بەهۆی زنجیرەیەک "کاری سازدانەوە و شارستانی"، 12 کێبڵی کارەبای 132 کەی ڤیی پاڵەپەستۆی بەرز زیانیان بەرکەوت.
ئەوەش بوو بەهۆی پچڕانی پێدانی کارەبا بە وێستگەکانی نووسەران و پارک لە هەولێر.
بەم هۆیەوە، نزیکەی 72 هەزار هاوڵاتی دووچاری پچڕانی کارەبا بوونەتەوە.
گەڕەکەکانی (نووسەران، حاکماوە، تەیراوە، بەشێکی بەختیاری، سەڵاحەددین، ئاری، تاوەرەکانی گوڵان، پڕۆژەی کواترۆ، سکای تاوەر و بۆلیڤارد)، بێ کارەبا بوون.
23ـى مانگ کێشەکە چارەسەر کرا
وەزارەتى کارەبا هەینى بڵاویکردەوە، تیمەکانی بەڕێوەبەرایەتیی گواستنەوەی کارەبای هەولێر، گرفتی وێستگەی (132KV)ی نووسەرانیان چارەسەر کرد و سەرجەم فیدەرەکانی بەسترانەوە و دوای پێنج رۆژ لە پچڕانی، کارەبای هەزار بەشداربووی سنووری وێستگەکە ئاسایی بووەوە.
وەزارەتى کارەبا ئەمڕۆ چى گوت؟
تیمەکان لە ماوەی پێنج ڕۆژی رابردوودا، بە بەردەوامی بەشەو و ڕۆژ کاریان لەسەر چارەسەرکردنی کێشەی وێستگەی کارەبای نووسەران لە سەنتەری شاری هەولێر کرد.
زۆربەی گرفتەکانی چارەسەر کرد، بەڵام شەوی رابردوو، دووبارە چەند کێشەیەکی تەکنیکی ڕوویاندا.
لە دوایین ڕاگەیێنراودا وەزارەتى کارەبا دەشڵێت "تیمەکان سەرقاڵی چارەسەرکردنی گرفتەکەن بۆ ئەوەی دۆخی کارەبا لە تەواوی گەڕەکەکانی نووسەران و دەوروبەری ئاسایی ببێتەوە".
