رافائێل نادالی ئیسپانی نەیتوانی بەربەستی جۆردان تۆمسۆنی ئوسترالی تێپەڕێنێت و بەئەنجامی دوو کۆمەڵە بەرامبەر کۆمەڵەیەک شکستیهێنا و ماڵئاوایی لە پاڵەوانییەتی بریسبن کرد.

نادال سەرەڕای ئەوەی کۆمەڵەی یەکەمی بەئەنجامی 7 بە 5 لەبەرژەوەندی خۆی یەکلاکردەوە، بەڵام دواتر ئاستی دابەزینێکی بەرچاوی بەخۆیەوەبینی و نەیتوانی پارێزگاری لەپێشکەوتنەکەی بکات.

تۆمسۆن، لەدوو کۆمەڵەی دواتردا ئاستێک بەرزی پێشکەشکرد و هەڵەکانی ئەستێرە ئیسپانییەکەی بەباشترین شێوە قۆستەوە و توانی بەئەنجامی 7 بە 6 و 6 بە 3 بردنەوە بەدەستبهێنێت و بەوشێوەیە نادالی کردە دەرەوە و بلیتێکی قۆناغی پێش کۆتایی مسۆگەرکرد، لەو قۆناغەشدا رووبەڕووی گریگۆر دیمیترۆڤی بولگاری دەبێتەوە.

نادال، ساڵی رابردوو بەهۆی پێکانەوە لە یارییکردن دوورکەوتەوە، ئەم پاڵەوانییەتیە یەکەم بەشداریکردنی بوو لەدوای چاکبوونەوەی لەپێکانەکەی.