هاوپەیمانیی ئیدارەی دەوڵەت: عێراق لە سزاکانی ئەمریکا بپارێزرێت
پووختەی هەواڵەکە:
- هاوپەیمانیی ئیدارەی دەوڵەت بە بەشداریی بافڵ جەلال تاڵەبانی لە بەغداد کۆبووەوە.
- کۆبوونەوەکە جەختی لەسەر پاراستنی عێراق لە لێکەوتەی سزاکانی ئەمریکا بۆ سەر ناوچەکە کردەوە.
- سەرۆکی ئەنجوومەنی دادوەری ڕێوشوێنە یاساییەکانی دەسەڵاتی دادوەریی لەسەر چەند دۆسیەیەک خستەڕوو.
- پشتیوانی بۆ هەوڵەکانی بەرەنگاربوونەوەی گەندەڵی و پاراستنی سەقامگیریی وڵات دووپاتکرایەوە.
لە کۆبوونەوە داخراوەکەی کۆشکی حکومیدا، سەرکردەکانی هاوپەیمانیی ئیدارەی دەوڵەت دۆسیەی مەترسیی سزاکانی واشنتنیان خستووەتە سەرووی ئەولەویەتەکان؛ کۆبوونەوەکە بۆ داڕشتنی هێڵێکی بەرگریی ئابووری و سیاسی بووە بە ئامانجی دوورخستنەوەی تەواوەتیی دامەزراوە داراییەکانی عێراق لە لێکەوتەی ڕێکارە سەپێنراوەکانی ئەمریکا بەسەر وڵاتانی ناوچەکەدا.
تەوەری سەرکردە سیاسییە بەشداربووەکانی هاوپەیمانێتییەکە لەسەر ئەم خاڵانە چڕبووەوە:
- پێویستیی گرتنەبەری سیاسەتێکی هاوسەنگ بۆ بەدوورگرتنی کەرتی ئابووریی عێراق لە سزاکانی ویلایەتە یەکگرتووەکانی ئەمریکا.
- یەکخستنی هەوڵە نیشتمانییەکان لەنێوان لایەنە سیاسییەکان بۆ پاراستنی سەروەریی خاکی عێراق و سەقامگیریی وڵات.
- بەردەوامیدان بە پشتیوانیکردنی کارنامەی حکومەت لە جێبەجێکردنی پرۆژە بنەڕەتییەکان و ڕێگریکردن لە گەندەڵی.
دەسەڵاتی دادوەری عێراق:
دەسەڵاتی دادوەری لە ڕێگەی فایەق زێدان، سەرۆکی ئەنجوومەنی باڵای دادوەریی عێراقەوە تێڕوانینی یاسایی خۆی خستەڕوو؛ ناوبراو ڕێکارە فەرمییەکانی دادگاکانی لە مامەڵەکردن لەگەڵ دۆسیە دارایی و ئەمنییە هەستیارەکان ڕوونکردەوە، بە جەختکردنەوە لەسەر سەربەخۆیی دادگاکان لە سەپاندنی یاسا و لێپرسینەوە لە سەرپێچیکاران وەک بەشێک لە گەرەنتییەکانی پاراستنی سیستمەکە.
هاوپەیمانیی ئیدارەی دەوڵەت لە کۆتایی ساڵی 2022 پێکهێنرا و زۆرینەی هێزە سیاسییەکانی عێراق، جگە لە ڕەوتی سەدر، لەخۆدەگرێت.
زانیاری زیاتر بۆ تۆ:
بە بەشداریی بافڵ جەلال تاڵەبانی هاوپەیمانیی ئیدارەى دەوڵەت لە بەغداد کۆبووەوە
