کۆمپانیای مێتای خاوەنی فەیسبوک و ئینستاگرام، مۆدێلێکی نوێی ژیریی دەستکردی راگەیاند بەناوی Movie Gen، کە دەتوانێت کلیپی ڤیدیۆ و دەنگی راستەقینە لەسەر بنەمای ئامۆژگارییەکانی بەکارهێنەر و بە پێدانی تێکست دروستبکات.

مێتا بانگەشەی ئەوەدەکات ئامڕازەکەیان دەتوانێت رکابەری تەکنەلۆجیا هاوشێوەکانی کۆمپانیا پێشەنگەکانی ژیریی دەستکرد وەک ئۆپن ئەی ئای و ئیلێڤن لابس بکات.

ئەو نموونانەی کە مێتا بڵاویکردونەتەوە بریتین لە ڤیدیۆی چەند ئاژەڵێک کە بەشداری چالاکییەکانی ناو ئاو دەکەن، هەروەها کلیپی کەسی کە وێنەی راستەقینە دەکاتە ڤیدیۆ و بەپێدانی سیناریۆیەک وێنەکە دەستدەکات بە جوڵە، لەگەڵ ئەمانەشدا "مۆڤی جێن" توانای دروستکردنی دەنگ و کارتێکەری دەنگی بۆ ڤیدیۆکانیش هەیە، کە هەر ڤیدیۆیەک تاوەکو درێژی 16 چرکە و تراکی دەنگیش تا 45 چرکە.

ئەم راگەیاندنە لە کاتێکدایە کە گفتوگۆی بەردەوام لە هۆلیووددا سەبارەت بە توانا و ئاڵنگارییەکانی ژیریی دەستکردی بەرهەمهێن لە فیلمسازیدا بەردەوامە، بە تایبەتیش دوای ئەوەی کۆمپانیای OpenAI لە سەرەتای ئەمساڵدا ئامرازی دروستکردنی ڤیدیۆی تایبەتی خۆی بەناوی سۆرا نمایش کرد.