شەپۆلێکی نوێی هۆشداری لە بوونی بۆمب فڕۆکەخانەکانی ئەورووپای گرتووەتەوە
پووختەی هەواڵەکە
فڕۆکەخانەکانی فەرەنسا و ئیتاڵیا و پورتوگال ئاگادارکردنەوەی ئەمنییان پێگەیشتووە.
ژمارەیەک دەزگای ڕاگەیاندن لە ئێرلەندا ئاگادارکردنەوەی بوونی بۆمبیان پێگەیشتووە.
شەپۆلێکی ئاگادارکردنەوەی هەبوونی بۆمب لە فڕۆکەخانەکانی ئەورووپا لە ڕۆژی پێنجشەممەوە دەستی پێکردووە کە بووەتە هۆی گۆڕینی ئاڕاستە و هەڵوەشاندنەوەی دەیان گەشت و ئەنجامدانی نیشتنەوەی خۆپارێزی.
وڵاتانی ئەورووپا
لە فەرەنسا، نووسینگەی سەرۆکوەزیران ئاماژەی بە چوار ئاگادارکردنەوەی نوێ دا سەبارەت بە هەبوونی بۆمب کە گەشتە ئاسمانییەکانی ئەو وڵاتە دەکاتە ئامانج، بەبێ ئەوەی وردەکارییان ئاشکرا بکرێت.
لە پورتوگال، فڕۆکەیەکی کۆمپانیای "ڕایان ئێر" کە لە ڕۆماوە بەرەو لیسبۆن دەڕۆیشت، ئاگادارکردنەوەی لەبارەی هەبوونی بۆمبەوە پێگەیشت، دواتر پۆلیسی پورتوگال پشتڕاستی کردەوە، دوای پشکنینی وردی فڕۆکەکە و کەلوپەلی گەشتیاران، هیچ شتێکی گوماناوی نەدۆزراوەتەوە.
لە ئیتاڵیاش، فڕۆکەیەکی کۆمپانیای "ویز ئێر" کە لە پراگەوە بەرەو ڕۆما دەچوو، گۆڕانکاری لە ئاڕاستەی گەشتەکەیدا کرا بەرەو ڤینیسیا، دوای ئەوەی تاوەرێکی چاودێری پەیوەندییەکی تەلەفۆنیی نەناسراوی پێگەیشتبوو، فڕۆکەکە بە سەلامەتی نیشتەوە و پشکنینی پێویستی بۆ ئەنجامدرا.
پۆلیسی کۆماری چیک ڕایگەیاند، لێکۆڵینەوە لە چەند هۆشدارییەک دەکات سەبارەت بە 9 گەشتی فڕۆکە کە گوایە بە بۆمب کراونەتە ئامانج، لە کاتێکدا ڕێکاری ئەمنی زیاتر لە فڕۆکەخانەی پراگ دەخرێنە بواری جێبەجێکردنەوە.
لە دانیمارکیش، پۆلیس بەشێوەیەکی خۆپارێزانە لە فڕۆکەخانەی کۆپنهاگن بەردەوامە لە ڕێکارە ئەمنییەکان و ئاماژەی بەوە کردووە کە بەپێی هەڵسەنگاندنە بەراییەکان هیچ مەترسییەک لەسەر سەلامەتیی گەشتیاران نییە.
لە ئێرلەنداش پۆلیس لێکۆڵینەوە لە چەند ئیمەیڵێکی ئاگادارکردنەوە دەکات کە ئاڕاستەی چەند دەزگایەکی ڕاگەیاندن کرابوون لە دەبلن، بەڵام هێزە ئەمنییەکان دوای پشکنینی باڵەخانەکان ڕایانگەیاند، بارودۆخەکە لەژێر کۆنتڕۆڵدایە.
تاوەکو ئێستا هیچ گرووپ و لایەنێک بەرپرسیارێتیی ئاگادارکردنەوەکانی نەگرتووەتە ئەستۆ کە کاریگەرییان لەسەر دەیان گەشت لە وڵاتانی ئەورووپا هەبوو.
