پووختەى هەواڵەکە

• گەڕاندنەوەى بودجە بۆ وەزارەتى دارایی عێراق پەیوەستە بە زیادکردنى ژمارەى وەزارەتەکان.

• فراکسیۆنى یەکێتى: دەرفەتە کورد دەست بە گفتوگۆکانى بکاتەوە.

• فراکسیۆنى یەکێتى: ڕەشنووسى بودجەکە بۆ هەرێمى کوردستان زۆر خراپە.

  ---

هەرێم کەمال ئاغا، سەرۆکى فڕاکسیۆنى یەکێتی لە ئەنجوومەنى نوێنەرانى عێراق، بە کەناڵ8ـى ڕاگەیاند، ڕەشنووسى بودجە بۆ هەرێمى کوردستان زۆر خراپە، گەڕاندنەوەى بودجە دەرفەتە بۆ هەرێمى کوردستان و بڕیارە لە چەند ڕۆژى داهاتوو شاندێک لە هەرێمى کوردستانەوە بە مەبەستى گفتوگۆ لەسەر پشکى هەرێمى کوردستان سەردانى بەغداد بکات.

ئەو کێشانەى بەرۆکى هەرێمى کوردستانى گرتووە

• ڕێژەى دانیشتووان.

• نەوت و غاز.

• بەشە بودجەى هەرێمى کوردستان.

ئەمساڵ حکومەتى فیدراڵ جیاواز لە ساڵانى ڕابردوو لە کاتى ئامادەکردنى ڕەشنووسى بودجە بە فەرمى بانگێشتى شاندى هەرێمى کوردستانى کرد، بەڵام زۆرینەى داواکارییەکانى پشتگوێخست و هەوڵى سەپاندنى مەرجەکانى خۆی لە بودجە دەدات، جارێکى دیکە ناردنى بودجەى هەرێمى کوردستان دەبەستێتەوە بە چەند کۆت و بەندێکەوە.