پووختەى ڕاپۆرتەکە:

• بەهۆی قەرزی کارەباوە کێشە بۆ دانیشتووانی بەشێک لە پرۆژەکانی نیشتەجێبوون دروستبووە.

• دانیشتووانی پرۆژەکان: کۆمپانیاکان دەیانەوێت قەرزی کارەبای پرۆژەکان بخەنە ئەستۆی ئێمە.

• پرۆژەى ڕووناکى لەلایەن هاونیشتمانییانەوە ڕەخنە و گلەیى لەسەرە.

پرۆژەی کارەبای ڕووناکی، بەهۆی کەڵەکەبوونی قەرز و نەدانی کرێی کارەبای خزمەتگوزارییە گشتییەکانەوە، تەزووی کارەبای بەرزکەرەوەکان و چەند خزمەتگوزارییەکی گشتیی ژمارەیەک پرۆژەیەکی نیشتەجێبوونی لە سلێمانی بڕیوە.

دانیشتووانی پرۆژەکان لە دوو شت نیگەرانن:

• بڕینی کارەباى بەرزکەرەوەکان.

• هەنگاوی کۆمپانیاکانی خزمەتگوزاری و ئیدارەی پرۆژەکان کە دەیانەوێت قورسایی ئەو قەرزە کەڵەکەبووانە بخەنە سەر شانی دانیشتووان.

کۆمپانیاکانی خزمەتگوزاریی پرۆژەکانی نیشتەجێبوون:

• ئێمە بێبەرین لە دروستکردنی ئەم کێشەیە.

• پێشتر بە ڕێنماییەکی فەرمیی بەڕێوەبەرایەتیی کارەبا ئاگادارکراوینەتەوە کە پارەی کارەبای ئەو خزمەتگوزارییانە لە دانیشتووان وەربگرن.

بەڕێوەبەری گشتیی وەبەرهێنانی سلێمانی:

• لە ئایندەیەکی نزیکدا ئەو کێشەیە چارەسەر دەکەین.

• بەشێوازێکی دادپەروەرانە کۆی پارەی کارەبای بەرزکەرەوە و خزمەتگوزارییەکانی دیکە دابەشدەکەین .

• دەبێت لە ئێستا بەدواوە لەلایەن هاونیشتمانییانەوە بدرێت.

بە گوتەی دانیشتووانی بەشێک لە پرۆژەکانی نیشتەجێبوون مانگانە بۆ دابینکردنی خزمەتگوزارییەکان، نزیکەی 60 هەزار دینار دەدەن بە کۆمپانیاکانی خزمەتگوزاری و زیادکردنی ئەو بڕە پارەیە دەبێتە بارگرانی بۆ سەر شانیان.