ئەحمەد بەگی کوڕی حەسەن بەگی کوڕی عەزیز بەگی کوڕی کەریم بەگزادە، ناسراو بە ئەحمەد هەردی، یەکێکە لە دیارترین شاعیر و نووسەرانی کورد، ساڵی 1922 لە سلێمانی لەدایکبووە، ساڵی 1957 کۆمەڵێک هۆنراوەی بە ناونیشانی "رازی تەنیایی" بڵاوکردووەتەوە.

ئەحمەد هەردی:

• ساڵی 1938، لە تەمەنی 16 ساڵیدا، هۆنراوەیەکی دەنگدانەوەی دروستکردووە و لەو کاتەوە نازناوی هەردی بە خۆی بەخشیوە

• مامۆستای قۆناغی سەرەتایی و وانەبێژ و مامۆستای زانکۆ بووە

• ماوەیەک سەرۆکی لقی سلێمانیی یەکێتیی نووسەرانی کورد بووە

• جگە لە نووسینی شیعر لێکۆڵینەوەی هەبووە

• شیعرەکانی لەلایەن گۆرانیبێژانەوە وەکو هۆنراوەی گۆرانی بەکارهاتوون

بای ئەجەل ھات و لەناو کاو، دەفتەری ژینی دڕیم

تاکوو دوێنێ خونچە بووم ئەمڕۆ بە ناحەق ھەڵوەریم!

وەک چۆن برووسکە نەونەمامێ داڕنێ، وەختی چرۆ

ھات و گوللـەی وێڵ لە ناکاو بێگوناهـ جەرگی بڕیم!

لە دیارترین شیعرەکانی:

• ئەی دیدە پەری

• چەپکە گوڵێک بۆ ست فاتمە

• تەپڵی بەتاڵ

• پەیامی یار

ئەحمەد هەردی، ڕێکەوتی 29ی تشرینی یەکەمی 2006، لە تەمەنی 84 ساڵیدا لە شاری سلێمانی کۆچی دوایی کردووە.