د. عەلى قەرەداغى نامەیەک بۆ بافڵ جەلال تاڵەبانى و مەسعود بارزانى دەنێرێت
پووختەى هەواڵ
کاردانەوەکانى هەڵبژاردنى دەستەى سەرۆکایەتیى پەرلەمان و بڕیارى کشانەوەى یەکێتى لە حکومەت بەردەوامن.
د. عەلى قەرەداغى هۆشداریى لەبارەى دۆخى ناوچەکە و مەترسییەکانى لەسەر هەرێمى کوردستان دەدات.
ناوبراو داواى کۆبوونەوە دەکات بۆ چارەسەرى کێشەکان.
د. عەلى قەرەداغى سەرۆکی یەکێتیی جیهانیی زانایانی موسڵمان، لە نامەکەدا بۆ هەریەک لە بافڵ جەلال تاڵەبانى و مەسعود بارزانى کە یەک ناوەڕۆکى هەیە دەڵێت "ئەمڕۆ ناوچەکە و جیهان لە بەردەم هەرەشەیەکی جددی شەڕ و ئاژاوەدایە بەجۆرێک کوردستانی ئازیزیشمان لێی بەدوور نییە". بەبۆچوونى ئەو یەکڕیزی و تەبایی لە هەموو کات زیاتر پێویستە بۆ پاراستنی قەوارەی هەرێمى کوردستان.
د. عەلى قەرەداغى لە نامەکەدا:
گەلی کوردستان لە درێژایی مێژووی خەبات و ماندووبوونی، قوربانی چەندین کارەسات و ناسۆری گەورە بووە.
لە دڕندەیی شاڵاوەکانی بەناو ئەنفال و کیمیابارانی هەڵەبجەی شەهیدەوە، تاوەکو دەگاتە کاولکاری گوندەکان و زەوتکردنی مافە سەرەتاییەکانی.
ئەم ئەزموونە حوکمرانی و سیاسییەی ئەمڕۆمان، دیارییەک نییە بەڵکو بەرهەمی پڕ لە خوێنی هەزاران شەهید و تێکۆشانی دەیان ساڵەی شۆڕشە مەزنەکانی ئەم گەلە ستەملێکراوەیە.
زۆر نادادپەروەرییە ئەگەر ململانێ و جیاوازییە سیاسییەکان ببنە هۆی لاوازکردن یان لەناوبردنی ئەم دەستکەوتە مێژووییە و خستنەمەترسی ئایندەی نەتەوەکەمان.
داواکارییەک بۆ کۆبوونەوە
د. عەلى قەرەداغى لە نامەکەدا داوا لە هەریەک لە بافڵ جەلال تاڵەبانى و مەسعود بارزانى دەکات “لە سۆنگەی بەرپرسیارێتی نیشتمانی و ئاینییەوە، جیاوازییەکان بەلاوە بنێن و لەسەر مێزی گفتوگۆ بە گیانی لێکتێگەیشتن کێشەکان چارەسەر بکەن، بۆ ئەوەی بڕیارەکان لە خزمەتی گەلەکەماندا بن کە لە دۆخێکی ئابووریی قورس و دژواردا ژیان بەسەر دەبات”.
نامەکەى د. عەلى قەرەداغى دواى ئەوە دێت، چوارى تشرینى دووەم پارتى و چەند پەرلەمانتارێک و سێ پەرلەمانتارى پێکهاتەکان، بەبێ ڕێککەوتنى سیاسی، کۆبوونەوەى پەرلەمانى کوردستانی کرد و دەستەى سەرۆکایەتی هەڵبژارد، ڕۆژێک دواتر بافڵ جەلال تاڵەبانى، بڕیارى کشانەوەى یەکێتى لە حکومەت دا.
زانیاریى زیاتر بۆ تۆ:
کاردانەوەی پەیامەکەی بافڵ جەلال تاڵەبانی لە میدیا جیهانییەکان
کەناڵ8 ناوەڕۆکى کۆبوونەوەى تیمى یەکێتى لە حکومەت ئاشکرا دەکات
