پووختەى هەواڵەکە:

• پرۆژەیاساکە چەند مافێکى بۆ فەرمانبەران تێدایە.

• مۆڵەت بە مووچە و بەبێ مووچە لەناو پرۆژەکەدایە.

• دواى بڵاوکردنەوەى لە ڕۆژنامەى وەقائیعی عێراق جێبەجێ دەکرێت.

ئەنجوومەنى نوێنەرانى عێراق، ئەمڕۆ یەکشەممە پرۆژەیاسای (پێدانی مۆڵەتی درێژخایەنى بە فەرمانبەران) پەسەند کرد.

جاسم عەتییە، ئەندامى ئەنجوومەنى نوێنەران بۆ کەناڵ8:

• فەرمانبەر ناچار نییە تەنیا لەسەر مووچەکەى بژى.

• هەیانە دوکان، یاخود کارگەى هەیە، هەشە دەیەوێت دەرفەتێکى دیکەى کارى دەستبکەوێت.

• ئەمەش لە یاساکەدا ڕێکخراوە و بۆى نییە لەو کۆمپانیایانەى کەرتى تایبەت کاربکات کە لەگەڵ حکومەت کار دەکەن.

• یاساکە 15 ماددەیە و وردەکارى لەوبارەوەیە تێدایە و بۆ خانەنشینى پارەى مانگانەى لێدەبڕێت.

• بۆچوونم وایە یاساکە لەبەرژەوەندى فەرمانبەراندایە.

گرنگترین خاڵەکانی ئەم پرۆژەیاسایە:

• مۆڵەت بە مووچەی بنەڕەتی: وەزیر، پارێزگار، یان سەرۆکی دامەزراوەکان دەسەڵاتیان دەبێت مۆڵەتێکی (5) پێنج ساڵی بدەنە فەرمانبەرانی هەمیشەیى.

• فەرمانبەران نابێت خزمەتی لە دوو ساڵ کەمتر بێت.

• لەم ماوەیەدا مووچەی بنەڕەتی وەردەگرێت.

• فەرمانبەر دەتوانێت بۆ یەک جار مۆڵەتەکەی نوێ بکاتەوە، بەڵام بۆ جاری دووەم بە نیوەی مووچەی بنەڕەتی دەبێت.

• پرۆژەکە ڕێگەش دەدات بە پێدانی مۆڵەتی بێ مووچە بۆ ماوەی ساڵێک کە شایستەی نوێکردنەوە بێت بۆ چەند جارێک.

• فەرمانبەرانی مۆڵەتپێدراو مافی کارکردنیان لە کەرتی تایبەتدا دەبێت، بەڵام کارکردن لەو کۆمپانیا و لایەنانەی کە بەرژەوەندی یان گرێبەستی ڕاستەوخۆیان لەگەڵ فەرمانگەی ڕەسەنی فەرمانبەرەکەدا هەیە، قەدەغەیە.

• ماوەی مۆڵەتەکە وەک خزمەتی خانەنشینی ئەژمار دەکرێت، بە مەرجێک فەرمانبەرەکە تەواوی لێبڕینی خانەنشینی (پشکی فەرمانبەر و پشکی دەوڵەت) بدات.

• هیچ بڕوانامەیەکی خوێندن کە فەرمانبەر لە ماوەی مۆڵەتەکەیدا بەدەستی بهێنێت، بۆ مەبەستی سەرمووچە و پلەبەرزکردنەوەی وەزیفی ئەژمار ناکرێت.

• بۆ ڕێگریکردن لە زیادبوونی میلاکات، فەرمانگەکان بۆیان نییە لە شوێنی ئەو فەرمانبەرەی کە مۆڵەتی وەرگرتووە، کەسی نوێ بە هەمان بڕوانامە و پسپۆڕی دابمەزرێنن.

ئەم یاسایە لەلایەن سەرۆککۆمارەوە واژۆ دەکرێت و پاشان لە ڕۆژنامەی فەرمیدا بڵاودەکرێتەوە و دەچێتە بواری جێبەجێکردنەوە.

زانیاریى زیاتر بۆ تۆ:

ئەمڕۆ ئەنجوومەنى نوێنەران بۆ دەنگدان لەسەر پڕۆژەیاسای مۆڵەتى فەرمانبەر کۆدەبێتەوە

ئەنجوومەنى نوێنەرانى عێراق 30 ڕۆژ وەرزى یاسادانانى درێژکردەوە