پووختەى هەواڵ

• لافاوەکەى شەممە زیانى زۆرى بە ماڵى هاونیشتمانییان گەیاند.

• لە هەندێک شوێن هێشتا تیمە حکومییەکان نەچوون بۆ پاککردنەوەى ماڵان و هاونیشتمانییان بە هەرەوەزى دەستیان بە پاککردنەوە کردووە.

• قاتى یەکەمى زۆرینەى ماڵەکان قوڕ و لیتەیان تێچووە و کەلوپەلەکانیش خراپ بوون.

• هەندێک لەو ماڵانەى لافاوەکە وێرانى کردوون، کرێچین و هەندێکشیان تازە چوونەتە کەژاوەى زێڕینەوە.

پاککردنەوەی ماڵە زیانلێکەوتووەکانی لافاوەکەی هەولێر بە خاوی بەڕێوەدەچێت و بەشێک لە ماڵەکان هێشتا قوڕاوى لافاوەکەیان تێدا ماوە، شەقامەکان پڕن لە قوڕ و و لیتە، هاونیشتمانییان چاوەڕوانى گەیشتنى تیمەکانى شارەوانین.

هاونیشتمانییەک بەناوى عەبدوڵا، 20 ڕۆژە هاوسەرگیرى کردووە و لافاوەکە ماڵەکەى وێرانکردووە و زیانى زۆریشى بە ئۆتۆمبێلەکەى گەیاندووە. عەبدوڵا کرێچییە و خوێندکارى زانکۆیە.

پەیامنێرى کەناڵ8 چووەتە ماڵەکەى و ئەم دیمانەیەى لەگەڵدا کردووە.

ژمارەیەک هاونیشتمانى بۆ کەناڵ8:

• چەندین شوێن تاوەکو ئێستا کەس نەهاتووە بە دەممانەوە.

• خەمڵاندن بۆ زیانەکان و ماڵەکانمان پاککنەکراونەتەوە.

• هاوکاری و خۆراکمان پێنەگەیشتووە لە کاتێکدا هیچمان بۆ دەرنەچووە خواردن ئامادەبکەین.

• ماڵ هەیە هیچی بۆ دەرنەچووە و تەنیا توانیویانە خۆیان و منداڵەکانیان ڕزگار بکەن.

• ماڵیش هەیە بەهاوکارى دراوسێکانی ڕزگارى کراوە.

ڕۆژى 7ـى تشرینى دووەم، لافاو شارى هەولێرى گرتەوە و بەهۆیەوە دوو هاونیشتمانیى گیانیان لەدەستدا، سەدان ماڵ و ئۆتۆمبێل، دوکان و بازاڕ و شوێنى گشتیى زیانیان بەرکەوت، دوێنێ یەکشەممە بڕیارى پێکهێنانى لیژنەى لێکۆڵینەوە درا.

زانیاریى زیاتر بۆ تۆ:

ئومێد خۆشناو: لە لافاوەکەی هەولێردا 300 کەس ڕزگار کراون

هاونیشتمانییەک: داوای هاوکاریم لە شارەوانى کرد گوتیان سێ ڕۆژی دیکە