لەسەر دژایەتى قەدەغەى حیجاب ئازەربایجان داوای حەوت هاوڵاتیی تورکیا دەکات
کاردانەوەکانى قەدەغەى لەچک و حیجاب لە ئازەربایجان بەردەوامن.
چالاکوانانى تورکیا ناڕەزایەتییان لە دژى بڕیارەکە دەربڕى بوو.
حکومەتى ئازەربایجان لە ناڕەزایەتیى چالاکوانە تورکەکان نیگەرانە.
پاش ئەوەی حکومەتی ئازەربایجان لەچک و باڵاپۆشی لە ناوەندەکانی خوێندن قەدەغەکرد، چالاکوانانی تورکیا لە تۆڕە کۆمەڵایەتییەکان ناڕەزایەتیی توندیان دەربڕی و لەبەردەم نوێنەرایەتییەکانی ئەو وڵاتە لە ئەنقەرە و ئیستانبووڵیش خۆپیشاندانیان کرد، ئەوەش کاردانەوەى بەرپرسانى باکوى لێکەوتەوە.
داواکاریی گشتیی ئازەربایجان:
لە ئاستی نێودەوڵەتیی داوای دەستگیرکردنی حەوت کەسمان کردووە، کە هاوڵاتیی تورکیان.
ئەو حەوت کەسە دەیانەوێت دەسەڵاتی ئازەربایجان بگۆڕن و توندڕەوی ئایینی بڵاودەکەنەوە.
بڕیارى بەندکردن:
دادگای باکو بڕیاری بەندکردنی بەشێوەی نائامادە بۆ ئەو حەوت کەسە دەرکرد.
تاوەکو ئێستا دیار نییە، تورکیا ئامادەیە ئەو حەوت کەسە دەستگیر بکات یان نا.
لە پاش قەدەغەکردنی لەچک و باڵاپۆشی و چەند ڕۆژێک پێش ئەو بڕیارەش، ئاڵۆزی کەوتە پەیوەندییەکانی ئازەربایجان و تورکیا، بەڵام بەرپرسانی هەردوو وڵات جەختیان لە برایەتی و بەهێزیی پەیوەندییەکانیان کردەوە.
