نووسەر، ئەندازیار و وەرگێڕی ڕووسی، سزادراو بۆ لەسێدارەدان، فیۆدۆر دۆستۆیەڤسکی، یەکێکە لە گەورەترین ڕۆماننووسانی ڕووسیا و جیهان.

فیۆدۆر میکایلۆڤیچ دۆستۆیەڤسکی:

• 11ی تشرینی دووەمی ساڵی 1821 لە شاری مۆسکۆ لەدایكبووە

• ڕۆماننووس، نووسەری کورتەچیرۆک، ڕۆژنامەنووس و بیرمەندی سەردەمی خۆی بووە

• ناوبانگەکەی بەهۆی دروستکردنی تێگەیشتی نوێ بووە سەبارەت بە مرۆڤایەتی لە گێڕانەوەکانیدا

• شیکردنەوەیەکی وردی کردووە سەبارەت بە دۆخی سیاسی و کۆمەڵاتیی ڕووسیا لە سەدەی نۆزدەیەمدا

• بە لێهاتوویی مامەڵەی لەگەڵ کۆمەڵێكی جۆراوجۆر لە بابەتە فەلسەفی و ئاینییەکان کردووە

بە منداڵی، دەستی بە خوێندنەوەی ئەدەب کردووە، لەڕێگەی خوێندنەوەی چیرۆکە خەیاڵییەکان و داستانەکانی نووسەرانی ڕووسیا و وڵاتانی بیانی، چاوی بە دونیا و جیهانی ئەدەب کراوەتەوە، لە تەمەنی 15 ساڵیدا، دایکی کۆچی دواییکردووە، هاوکات، پاش مردنی دایکی، دەستبەرداری قوتابخانە بووە و چووەتە پەیمانگەی ئەندازیاریی سەربازی، پاش دەرچوونی، وەک ئەندازیارێک کاری کردووە و هاوکات کتێبی وەرگێڕاوە.

• لە بیستەکانی تەمەنیدا دەستی بە نووسین کردووە

• یەکەم ڕۆمانی بەناوی "هەژاران" لە ساڵی 1846، لە تەمەنی 25 ساڵیدا بڵاوکردووەتەوە

• (هەژاران) لە ڕەوتی نوێیی ئەوکاتی ئەدەبدا، بوو بە یەکەمین سەرکەوتنی دۆستۆیەڤسکی لە جیهانی نووسینی ڕۆمان و چیرۆکە سەرەتایییەکاندا

• ئەم کتێبە یەکەم هەنگاوی بووە بۆ چوونە ناو بازنەی ئەدەب لە شاری سانت پیتەرسبێرگ

ساڵی 1849، بە تۆمەتی ئەندامێتیی لە کۆمەڵەی پێتراشێڤسکی، کە کۆمەڵەیەکی ئەدەبیی نهێنی بوون و پێکەوە گفتوگۆیان لەسەر ئەو کتێبانە کردووە کە ڕەخنەیان لە سیستمی حوکمڕانیی ئەوکاتی ڕووسیا دەگرت، سزای لەسێدارەدانی بۆ دەرچووە، لە کۆتا ساتەکانی پێش لەسێدارەدانیدا، سزاکەی گۆڕاوە بۆ چوار ساڵ کارکردنی قورس و شەش ساڵ لە خزمەتی سەربازی زۆرەملێ، ژیانیشی لەم ماوەیەدا، لە مەنفا بەسەربردووە.

دۆستۆیەڤسکی وەک ڕۆژنامەوان کاری کردووە:

• لە چەندین گۆڤاری ئەدەبییدا نوسینەکانی بڵاوبوونەتەوە

• نووسراوەکانی لە ڕۆژنامەدا، بە یاداشتەکانی نووسەر ناسراون، پێکهاتوون لە کۆمەڵێک بابەت، کە لەنێوان ساڵانی 1873-1881 نووسیونی

لە بەناوبانگترین بەرهەمەکانی دۆستۆیەڤسکی بریتین لە:

• برایانی کارامازۆف

• تاوان و سزا

• گێل و شەیتانەکان

لە تێکڕای ژیانی ئەدەبیی خۆیدا، 11 ڕۆمانی درێژ، سێ نۆڤلێت، 17 کورتەچیرۆک و ژمارەیەک لە بەرهەم و بابەتی دیکەی نووسیوە.

لەماوەی ژیانی ئەدەبیی خۆیدا، بووە بە یەکێک لە گەورەترین و ڕێزدارترین نووسەرەکانی ڕووسیا، زۆرینەی بەرهەمەکانی بۆ زیاتر لە 170 زمان وەرگێڕدراون، تەنانەت ئیلهامبەخشی ژمارەیەکی زۆر لە نووسەرە بەناوبانگەکانی ڕووسیا بووە وەک:

• پوشکین

• گۆگۆڵ

• بلزاک

• لێرمۆنتۆڤ

• هۆگۆ

لەلایەکی دیکەشەوە ژمارەیەك نووسەری دیکەی دەرەوەی ڕووسیا کاریگەربوون بە نوسینەکانی:

• جان پۆڵ سارتەر

• فریدریك نیچە

• ئەنتۆن شیخۆف

• ئەلیکساندەر سۆلژێنیستین

تاوەکو ئێستا، بە ئیلهامی ناوەڕۆکی ڕۆمان و چیرۆکەکانی دۆستۆیەڤسکی، زیاتر لە 125 بەرهەمی سینەمایی و تەلەفزیۆنیی بەرهەمهێنراون، هاوکات، تێڕووانینی ئەم نووسەرە بۆ ژیان، بەردەوامە لە دروستکردنی کاریگەریی لەسەر جیهان.

ڕێکەوتی 28ی تشرینی دووەمی 1881، لە تەمەنی 59 ساڵیدا، بەهۆی نەخۆشیی سییەکانەوە کۆچی دوایی کردووە و پاش تێپەڕینی سێ ڕۆژ بەسەر مردنەکەیدا، لە دێری ئالێکساندر نێڤسکی، لە شاری سان پیتەرسبۆرگ، بەخاک سپێردراوە.