پووختەی هەواڵەکە

• لە ڕووداوێکدا لە پارێزگای سلێمانی کۆمەڵێک پزیشکی پسپۆڕ لە ڕێگەی بەشداریکردنیان لە کارێکی بازرگانی پارەیەکی زۆریان لێ وەرگیراوە

• ئەم ڕووداوە دەنگدانەوەی زۆری بەدوای خۆیدا هێنا و بووە جێی سەرنجی ڕاگەیاندنەکان

• سەندیکانی پزیشکانی کوردستان دەڵێت: پێویست ناکات هیچ کەس و لایەنێک و کەناڵێکی ڕاگەیاندن ڕووداوەکە بە کار و پیشەی پزیشکییەوە گرێبدات، لە کاتێکدا ڕووداوەکە لە قۆناغی لێکۆڵینەوەی یاساییدایە

سەندیکانی پزیشکانی کوردستان-لقی سلێمانی سەبارەت بە ڕووداوی زەرەرمەندبوونی چەند پزیشکێک لە کارێکی بازرگانیدا، ڕاگەیەندراوێکی بڵاوکردەوە.

دەقی ڕاگەیەنراوەکەی سەندیکانی پزیشکانی کوردستان-لقی سلێمانی سەبارەت بە ڕووداوی زەرەرمەندبوونی چەند پزیشکێک لە کارێکی بازرگانیدا

• سەبارەت بە ئەو ڕووداوە نەخوازراوەی لە چەند ڕۆژی ڕابردوو بەهۆی زەرەرمەندبوونی کۆمەڵێک کەس ڕوویداوە و دەنگۆکەی لە کەناڵەکانی ڕاگەیاندن و تۆڕەکانی سۆشیاڵ میدیا بڵاوبووەتەوە، سەندیکانی پزیشکانی کوردستان-لقی سلێمانی بە پێویستی دەزانێت ڕوونکردنەوەیەک لەسەر ئەم بابەتە بۆ ڕای گشتی، پزیشکان و سەرجەم ڕاگەیاندنەکان بدات

• ڕووداوی ئەم جۆرە بابەتانە شتێکی نوێ و نامۆ نییە، بەداخەوە لە چەند ساڵی پێشوودا بە چەندین شێوەی جیاواز و لە چەندین ناوچەی جیاواز ئەم جۆرە ڕووداوانە دووبارە دەبنەوە

• پزیشکانی وەک هەر چینێکی دیکەی کۆمەڵگە ڕەنگە لە ئەم ڕووداوانەدا زەرەرمەند ببن، ئێمە جەخت لەوە دەکەینەوە ئەم بابەتە بە هیچ جۆرێک پەیوەندیی بە پیشەی پیرۆزی پزیشکییەوە نییە و وابەستەی کاری دامەزراوەیی پزیشکان نییە، پێویست ناکات هیچ کەس و لایەن و کەناڵێکی ڕاگەیاندن ڕووداوەکە بە کار و پیشەی پزیشکی گرێ بدات، بەتایبەت کە ڕووداوەکە لە قۆناغی لێکۆڵینەوەی یاساییدایە و لە کۆتایدا لایەنی تایبەتمەند و دادگا ئەم جۆرە ڕووداوانە یەکلا دەکەنەوە