پووختەى هەواڵەکە

• لە لایەن ئەمریکاوە سزاى نوێ بەسەر تاراندا سەپێندرا.

• سزاکان پێنج کەسایەتی و چوار کۆمپانیا و نۆ کەشتیی گرتوەتەوە.

• ئەمریکا بۆ کۆمپانیا جیهانییەکان: دوو بژاردەتان هەیە، یان لەگەڵ ئێمەن یان دژی ئێمەن.

  ---

وەزارەتی گەنجینەی ئەمریکا لە ڕاگەیێنراوێکدا ئاماژەی بەوەکرد، لە چوارچێوەی ئۆپەراسیۆنی پەراوێزخستنی ئابووریدا، گەنجینەی ئەمریکا، کۆمپانیای "کارناکیس و کەرناکیس"ـی خستە لیستی سزاکانەوە، ئەو کۆمپانیایە بنکەکەی لە پەنەما و یۆنانە و لەژێر ناوی ڕاوێژکاریی یاساییدا کاردەکات.

ناوەڕۆکى سزاکان:

• چەندین کۆمپانیای کەشتیوانی و کەشتیی دەریای خراونەتە لیستی سزاکانەوە.

• پشتیوانییان لە چالاکییە نایاساییەکانی کەشتیوانی ئێران کردووە.

• کۆمپانیاکان بە شێوەیەکی ناڕاستەوخۆ یارمەتی توانا داراییەکانی تارانیان داوە.

• هاوکارییەکان بە مەبەستى دابینکردنی بودجەی سەربازی و چەک و بەرنامە ئەتۆمییەکەى ئێران بووە.

• وەزارەتى گەنجینەی ئەمریکا بەردەوامە لە هەماهەنگیکردن لەگەڵ هاوتا ئەورووپی و جیهانییەکان.

• بە مەبەستى پچڕاندنی هێڵەکانی ئابووریی ئێران لەگەڵ جیهان.

سکۆت بێسێنت، وەزیری گەنجینەی ئەمریکا ڕاگەیێنراوەکەی لە تۆڕی ئێکس بڵاوکردووەتەوە و لەسەری نوسیووە: "کاتێک دەتەوێت لە دەریا گواستنەوەی نەوتی نایاسایی ئەنجام بدەیت، یان لە نووسینگەی کۆمپانیایەکی نایاسایی دادەنیشیت، ئەگەر پشتیوانی دەسەڵاتی ئێران بکەیت، ئێمە دەتدۆزینەوە و سزات دەدەین".

بێسێنت بەو کۆمپانیا و بازرگانانە دەڵێت کە مامەڵە لەگەڵ ئێران دەکەن: "دوو بژاردەتان هەیە، یان لەگەڵ ئێمەن یان دژی ئێمەن، ئێمە دەزانین کێن و چی دەکەن و بەردەوام دەبین لە سزادانتان".