پووختەى هەواڵەکە

• دوێنێ هەواڵى دەستگیرکردنى کەسێک لە گەرمیان بڵاوکرایەوە.

• لە تۆڕە کۆمەڵایەتییەکان و هەندێک میدیا وابڵاوکرایەوە کە مەلایە.

• لەناو مۆبایلى دەستگیرکراوەکەدا وێنەى نەشیاو هەبووە.

یەکێتیى زانایانى ئاینى ڕایگەیاند، لە پەنای دەستگیرکردنى ئەم کەسەوە هێرشی ناڕەوا کرایە سەر مامۆستایانی ئاینی، لە کاتێکدا ئەو کەسە هیچ پەیوەندی بە پیشە و کاری مەلایەتییەوە نییە و دەرچووی هیچ ناوەندێکی خوێندنی ئایینیش نییە.

یەکێتیى زانایانى ئاینى:

• ئەو کەسە سێ ساڵ بەر لە ئێستا خۆبەخشانە ماوەیەک کەم کاری پێشنوێژی کردووەو قورئانی خوێندووە و دوورخراوەتەوە.

• بۆ دڵنیایی هەموو لایەک، ئەو کەسە هیچ بڕوانامە و سیفەتێکی فەرمیی مەلایەتی نەبووە.

• لەهەمان کات نە ئەندامی یەکێتیی زانایانە، نە فەرمانبەر و خۆبەخشی فەرمی ئەوقافیشە.

• نیگەرانی زۆرمان لە دەزگایەکانی ڕاگەیاندن و سۆشیال میدیا ئەوەیە، کە بە هەستیاری و وەک خۆی مامەڵە لەگەڵ هەواڵ و رووداوەکان ناکەن و پیشە و ناوی پیرۆزی مەلایەتی لەبەر هەڵەی کەسێکی نا مەلا دەزڕێنن.

• بەداخەوە نەدەبوو بەشێکی کەناڵ و ماڵپەڕو تۆڕە کۆمەڵایەتییەکان بەو شێوەیە بڵاوی بکەنەوە.

• هەر کەس دەنگخۆش بوو یان پێشنوێژی کرد یان دوو ئایەت و فەرمودەی خوێندەوە و خۆی بەبانگخواز ناساند، مانای ئەوە نییە مەلا بێت.

یەکێتیى زانایان داواش لە لایەنی پەیوەندیدار دەکات ڕێکاری توندتر بەرامبەر ئەو کەسانە بگرنەبەر کە مۆڵەت و ڕێپێدانی مەلایەتییان نییە و مزگەوت بەکار دەهێنن.

پۆلیسى گەرمیان دوێنێ سێشەممە، دەستگیرکردنى دوو کەسى دانیشتووى کەلار و هەریرى ڕاگەیاند، یەکەمیان کە ئەوەیە بەناوى مەلا ناوبراوە و بەگوێرەى مادەی دووى خراپ بەکارهێنانی ئامێرەکانی پەیوەندی و تۆڕەکۆمەڵایەتییەکان دەستگیرکراوە و ئەوى دیکەشیان بەگوێرەى ماددەی (430) لە یاسای سزادانی عێراق بووە.