لە کۆرنیشەکەوە بۆ بناری گۆیژە؛ قۆناغی نوێی گەشەپێدانى سلێمانى

پووختەى هەواڵەکە

لە سلێمانی کارکردن لە چەندین پرۆژەی ستراتیجی بەردەوامە.
لە سلێمانی بەهۆی کارکردن لە پرۆژەکاندا چەندین هەلی کار ڕەخسێنراوە.
کۆمپانیا بیانییەکان بۆ وەبەرهێنان ڕوو لە سنووری پارێزگای سلێمانی دەکەن.
کارکردن لە ڕێگای دووکان - چوارقوڕنە - خەلەکان بەردەوامە.
ڕێگای چوون بۆ سەهۆڵەکە کراوەیە.
کارکردن لە پرۆژەی ئەندەرپاسی سالم بەردەوامە.

لە دەروازەی شارەوە کە پرۆژەی کۆرنیشە بێوێنەکەی سلێمانییە تاوەکو بناری گۆیژە و ئەزمڕ، سەدان شۆفڵ، حەفارە و کرێکار دەبینرێت لە پرۆژەکاندا کار دەکەن. بەگوێرەى ئەو ماستەرپلانەی بۆ سلێمانی دانراوە، لە چەند ساڵی داهاتوودا دەبێتە شارێکی تەواو مۆدێرن و پێشکەوتوو، شارێک پڕ لە پرۆژەی وەبەرهێنان و ڕەخساندنی دەرفەتی کار.

وەبەرهێنانى بیانى

چەندین کۆمپانیای ڕۆژهەڵاتی ناوەڕاست، ئەورووپی و ئەمریکی لە سنووری سلێمانی خەریکی وەبەرهێنانن و متمانەی وەبەرهێنانیان بە سلێمانى کردووە.

دیارترین پرۆژەکان:

قۆناغی یەکەمی پرۆژەکانی سلێمانی شەقام و ڕێگەبان و بەرزەپرد و ئەندەرپاسەکانن.
ڕێگای دووکان-چوارقوڕنە- خەلەکان دەکرێتە شەقامێکی دوو سایدی پێشکەوتوو و کارەکانی وا لە تەواوبوونە.
لەناو شاریش لە شەقامی سەد مەتری تاوەکو کوچە و کۆڵانەکانی شاریش کار دەکرێت بۆ فراوانکردنی شەقامەکان.
بەچڕى کار لە ئۆڤەرپاس و ئەندەرپاسەکان دەکرێت بۆ کەمکردنەوەی قەرەباڵخی و لۆدی شەقامەکان.

ئەندەرپاسی شەقامى سالم

تازەترین پرۆژەکانى ئەندەرپاس دەستپێکردنی پرۆژەی ئەندەرپاسی شەقامى سالمە کە چەند ڕۆژێکە لە بەشێکی شەقامەکەدا کارکردن دەستیپێکردووە.

بۆ ئەم پرۆژەیەش بێگومان بیرلەوە کراوەتەوە و کە لە دەستپێک تاوەکو کۆتایی زیندوێتی شەقامە ناسراوەکەی شار هەر بمێنێت و کاسبکارەکانی بێکار نەبن.

لە چەند ڕۆژی ڕابردوودا چەند پەیج و میدیایەکی لۆکاڵی، وایان بڵاوکردەوە کە گوایە شەقامەکە بەهۆی ئەو پرۆژەیەوە بەتەواوی داخراوە، بەڵام ئەوە دیمەنە ڕاستەقینەکە نییە و کار و کەسابەت بەردەوامە.