لە چەند گەڕەکێکی هەولێر لافاو چووە ناو ماڵەکانەوە و زیانی بە ئۆتۆمبێلی هاونیشتمانییان گەیاند؛ دانیشتووانی ئەو گەڕەکانە هۆکارەکەی بۆ نەبوونی ئاوەڕۆ و پرۆژەکانی نیشتەجێبوون دەگەڕێننەوە.
لە بەرەبەیانی ئەمڕۆوە، ئاو لە گەڕەکەکانی (تەیراوە، سەیداوە، فەرمانبەران) و شەقامەکانی 60 مەتری و 100 مەتری کۆبووەوە، بەو هۆیەوە دەیان ماڵ و ئۆتۆمبێل لەو سنوورانە زیانیان بەرکەوتووە.
بەگوتەی زیانلێکەوتووان، هۆکاری سەرەکیی لافاوەکە نەبوونی ئاوەڕۆیە لە گەڕەکەکانیان کە پێشتر لایەنە پەیوەندیدارەکانیان لێ ئاگادار کردووەتەوە؛ هاوکات باس لەوە دەکەن دروستکردنی چەند پرۆژەیەکی نیشتەجێبوون لە نزیک گەڕەکەکانیان ڕێڕەوی ئاوەکەی گۆڕیوە و ئاراستەی ماڵەکانی کردووە.
زیانلێکەوتووانی لافاوەکەی هەولێر داوا لە حکومەت و لایەنە بەرپرسەکان دەکەن بەدەم داواکارییەکانیانەوە بچن، هاوکارییان بکەن و قەرەبووی ئەو زیانانەیان بۆ بکەنەوە کە بەهۆی لافاوەکەوە بەریان کەوتووە.