
هاوسەرۆکی پارتی دەم ڕایگەیاند، ژمارەیەک سیاسیی دەبنە ئەندامی لیژنەکەی ئۆجەلان.
هاتیمئۆغوڵڵاری دەشڵێت، پێویستە دەستبەجێ یاسای پڕۆسەی ئاشتی بچێتە بواری جێبەجێکردن.
تولای هاتیمئۆغوڵڵاری، هاوسەرۆکی پارتی دەم ڕایدەگەیێنێت، لەو لیژنەیەی ئۆجەلانی تێدایە، ژمارەیەک سیاسەتمەداریش دەستبەکاردەبن و ئاماژە بەوەشدەکات، تورکیا و پەکەکە ئامادەکاریی بۆ جێبەجێکردنی یاساکە و گەڕانەوەی ئەندامانی پەکەکە دەکەن.
پاش ئەوەی پەکەکە خۆی هەڵوەشاندەوە و هێزەکانی لە باکووری کوردستان و نزیک لە تورکیا کشاندەوە، ئێستا چاوەکان کەوتووەنەتە سەر کۆبوونەوەی ئەنجوومەنی ئاسایشی نەتەوەیی تورکیا، کە بڕیارە مانگی داهاتوو بکرێت.
بۆ ئەوەی یاسای پڕۆسەکە بچێتە بواری جێبەجێکردن و ئەندامانی پەکەکە بگەڕێنەوە بۆ تورکیا، پێویستە لەو کۆبوونەوەیەدا چەکدانانی پەکەکە پشتڕاستبکرێتەوە.
پێویستە ئەنجوومەنەکە لەوە زیاتر چاوەڕێ نەکات و بەپەلە کۆببێتەوە.
پێویستە یاسای پڕۆسەکە جێبەجێبکرێت، بۆ ئەوەی قۆناغی دووەم دەستپێبکات.
دەوڵەت و پەکەکە ئامادەکارییان کردووە، بەتایبەت بۆ گەڕانەوەی ئەو گرووپە 30 کەسییەی چەکەکانیان سووتاند.
هاوکات ئامادەکاری بۆ گەڕانەوەی گرووپێکی دیاریکراو لە ئەورووپاوە دەکرێت.
لە زیندانەکاندا نزیکەی چوار هەزار زیندانییکراوی سیاسی هەن و داواکاریی ئەم کەسانە ئەوەیە یاسای پڕۆسەکە جێبەجێبکرێت و ئازاد بکرێن.
سەبارەت بە لیژنەی ئاشتی و بەسیاسیکردن کە عەبدوڵا ئۆجەلان هەماهەنگیکاری دەبێت هاتیمئۆغوڵڵاری دەڵێت، پارێزەرانی ئۆجەلان، بەشێک لە کەسایەتیی سیاسییەکان و چەند کەسێک لەو کەسانەی ناچاربوون ڕوو لە دەرەوەی تورکیا بکەن، لە لیژنەکەدا دەستبەکار دەبن.
سەبارەت بە پڕۆسەکەش هاتیمئۆغوڵڵاری دەڵێت، وا دەبینرێت پاش کۆبوونەوەکانی دەوڵەت و قەندیل، بەرەوپێشچوون دروستبووە و ئەو وەستانە نەماوە لە پڕۆسەکەدا هەبوو.

