سەرۆکی هەرێمی کوردستان لە ساڵیادی جینۆسایدی کوردانی فەیلی داوای گەڕانەوەی ماف و ڕەگەزنامە بۆ قوربانییان دەکات و ڕایدەگەیەنێت، حکومەتی عێراق دەبێت ئەرکی یاسایی خۆی بەرامبەر ئەو توێژە جێبەجێ بکات.

ساڵیادی جینۆسایدی کوردانی فەیلی

ئەمڕۆ شەممە، 4ـی نیسانی 2026، نێچیرڤان بارزانی، سەرۆکی هەرێمی کوردستان، پەیامێکی بەبۆنەی یادی 46 ساڵەی "جینۆسایدکردن و وڵاتبەدەرکردنی" کوردانی فەیلی بڵاوکردەوە. سەرۆکی هەرێمی کوردستان ئاماژەی بەوە کرد کە وڵاتبەدەرکردنی سەدان هەزار کوردی فەیلی و بێسەروشوێنکردنی دەیان هەزاری دیکەیان، جینۆسایدێکی ڕەگەزپەرستانەی ڕژێمی پێشوو بووە و مێژوویەکی ڕەشی بۆ عێراق بەجێهێشتووە.

داواکاریی قەرەبووکردنەوە و گەڕاندنەوەی مافەکان

نێچیرڤان بارزانی جەختی لەوە کردەوە کە حکومەتی فیدراڵیی عێراق دەبێت ئەرکی خۆی جێبەجێ بکات. بەپێی بڕیاری دادگای باڵای تاوانەکانی عێراق کە تاوانەکەی بە جینۆساید ناساندووە، پێویستە قەرەبووی مادی و مەعنەویی قوربانییان و زیانلێکەوتووان بکرێتەوە. هەروەها داوای کرد ڕەگەزنامە و موڵک و ماڵە زەوتکراوەکانیان بۆ بگەڕێنرێتەوە.

هۆکاری چەوساندنەوەی کوردانی فەیلی

لە پەیامەکەدا هاتووە کە کوردانی فەیلی لە شاڵاوێکی دڕندانەی ڕژێمی ئەوسای عێراقدا، تەنیا لەبەر کوردبوون و داکۆکیکردن لە ناسنامە و مافە ڕەواکانی گەلەکەیان ڕووبەڕووی سێدارە، کوشتن، گرتن و شوێنبزرکردن بوونەتەوە. سەرۆکی هەرێمی کوردستان خەبات و دڵسۆزیی ئەم توێژەی بە جێگەی شانازیی گەلی کوردستان وەسف کرد.

وانەوەرگرتن بۆ داهاتووی عێراق

نێچیرڤان بارزانی ئاماژەی بەوە کرد کە دەبێت ئەو ڕابردووە تاڵە ببێتە پەند و وانە بۆ هەمووان، تاوەکو بۆ داهاتوویەکی باشتر لەسەر بنەمای پێکەوەیی و یەکترقبووڵکردن لە عێراقدا سوودی لێ وەربگیرێت. دووپاتیشی کردەوە کە هەرێمی کوردستان بەردەوام دەبێت لە هەوڵ و کۆششەکانی و هەرچی پێویست بێت بۆ هاوکاریکردنی کوردانی فەیلی ئەنجامی دەدەن.