پووختەى هەواڵ

• بە دەستڕێژى گولـلە لەناو بازاڕى هەڵەبجەییەکان لە شارۆچکەى شارەزوور تەقەى لە قوربانییەکە کردبوو.

• دیمەنى تەقەکردنەکە لە تۆڕە کۆمەڵایەتییەکان بڵاوکرایەوە و کاردانەوەى لێکەوتەوە.

• کەسوکارەکەى ئارام داواى دەستگیرکردنى تۆمەتبارەکەیان کردبوو.

دەزگای ئاسایشی هەرێمى کوردستان ڕایگەیاند، شەوی ڕابردوو تۆمەتبار خۆی ڕادەستی بەڕێوەبەرایەتیی ئاسایشی پارێزگای هەڵەبجە کرد و دەستگیرا بەسەر ئۆتۆمبێل و دەمانچەکەیدا.

دەزگای ئاسایشی هەرێمى کوردستان:

• بەدواداچوون و لێکۆڵینەوەمان کرد.

• شوێنی خۆحەشاردانی تۆمەتبار دەستنیشان كرا.

• شەوی ڕابردوو خۆی ڕادەست کرد.

• تۆمەتبار بە ماددەی 406 لەیاسای سزادانی عێراقی ڕاگیراوە و لێکۆڵینەوە لە دۆسییەکە بەردەوامە.

ئارام لەسەر چى کوژرا؟

ئارام محەممەد، ناسراو بە ئارام ئیمامى ئێوارەى 29ـى ئەم مانگە لە شارەزوور کوژرا، دیمەنى کوشتنەکەى لە تۆڕەکۆمەڵایەتییەکان بڵاوکرایەوە و کاردانەوەى لێکەوتەوە.

شەوى ڕابردوو كەسوكارەکەى لە کۆنفرانسێکى ڕۆژنامەوانیدا باسیان لەوەکرد، کوڕەکەیان لەسەر مامەڵەیەكی (300) دۆلارى كێشەی لەگەڵ بكوژدا هەبووە و چەند جارێك یەخەیان پێگرتووە، جارێكیان چەند كەسێكیان چوون بۆی ئەمیش یەكێكیانی بریندار كردووە.

ئاماژەیان بەوەشکرد، دواتر بە هۆی ئەو كێشەیەوە پێنج ساڵ كرایە زیندان و دواتر ئازادكرا. داواشیان کرد تۆمەتبارەکە دەستگیربكرێت و سزای یاسایی خۆی بدرێت.