زەیدى حوشى؛ کارەکتەرى سەرەکى پشت کۆنتڕۆڵکردنى جورفولسەخر.
تۆقێنەرەکەی عێراق لە دۆسیەی عەدنان جومەیلییەوە بۆ کۆنتڕۆڵکردنی جورفولسەخر.
کێیە ئەو کەسەى بووەتە هەڵسوڕێنەر و کارەکتەرى سەرەکى عەلى زەیدى لە هەڵمەتەکانى بەرەنگاربوونەوەى گەندەڵى و پڕۆسەى کۆکردنەوەى چەک لە دەستى دەوڵەت. ئەوەى لە میدیا و شاشەکانەوە دەبینرێت، تەنیا دیوێکى بابەتەکەیە، دیوەکەى دیکەى کەسێکى دیکەیە، ئەو کەسە، فەرماندەیەکی مەیدانیی بریندار و پیشەگەری فیرقەی ئاڵتوونییە کە لە دۆسیەی گەندەڵییەوە بۆ جەنگی جورف ئەلسەخر، وەک قورسترین و کاریگەرترین گورزی دەستی عەلی زەیدی دەردەکەوێت، ئەو فەرماندەیەی بە ئۆپەراسیۆنی هەواڵگری و ورد، هاوسەنگیی هێز لە گۆڕەپانی عێراقدا دەگۆڕێت.
یەکێکە لە فەرماندە سەربازییە باڵاکانی عێراق.
لە ناوەڕاستی ئەمساڵەوە وەک سەرۆکی دەزگای دژەتیرۆری عێراق دەستبەکاربووە.
لە شوێنى فەریق ڕوکن کەریم عەبود تەمیمی.
زەید حوشى، دەرچووی کۆلێجی سەربازیی عێراقە لە سەرەتای نەوەدەکانی سەدەی ڕابردوو.
بڕوانامەی ماستەری لە زانستە سەربازییەکان لە کۆلێجی ئەرکانی عێراق بەدەستهێناوە.
بە هۆیەوە نازناوی "ڕوکن"ـی پێبەخشراوە.
ئەفسەرێکی پیشەگەری بواری هێزە تایبەتەکان و پیادەیە.
بە درێژایی خزمەتی سەربازی لە هێڵەکانی پێشەوەی شەڕ و ئۆپەراسیۆنە تایبەتەکاندا بووە.
لە ڕابردوودا ژمارەیەک ئەرک و بەرپرسیارێتى گرنگ و هەستیارى وەرگرتووە.
پێش ئەوەی ببێتە سەرۆکی دەزگاى دژە تیرۆر.
فەرماندەی فیرقەی هێزە تایبەتەکانی یەکەم بووە لە ناو دەزگای دژە تیرۆر.
کە بە "فیرقەی ئاڵتوونی" (الفرقة الذهبية) ناسراوە.
بەڕێوەبەری ئۆپەراسیۆنەکان بووە.
پاشان جێگری فەرماندەی ئۆپەراسیۆنە تایبەتەکان لە دەزگای دژەتیرۆر کاری کردووە.
بۆ ماوەیەک وەک ڕاوێژکاری سەربازی لە نووسینگەی سەرۆکوەزیرانی عێراق کارى کردووە.
لە مانگی تەمموزی 2026 بە فەرمانی عەلی زەیدی، وەک سەرۆکی دەزگای دژەتیرۆری عێراق دەستنیشان کرا.
حوشى لە شەڕی دژی داعش (2014 - 2017)، ڕۆڵێکی سەرەکی و مەیدانی هەبووە لە سەرکردایەتیکردنی هێزە تایبەتەکان لە پڕۆسەکانی ڕزگارکردنەوەی شارەکانی تکریت، ڕەمادی، فەلوجە و بە تایبەتیش شەڕی سەختی کۆنترۆڵکردنەوەی موسڵ.
بە هۆی ئەوەی دەزگای دژەتیرۆر ڕاستەوخۆ لە لایەن هێزەکانی هاوپەیمانان و ئەمریکاوە مەشق و ڕاهێنانیان پێکراوە، زەید حوشى ئەزموونێکی زۆری هەیە لە هەماهەنگیی سەربازی و هەواڵگری لەگەڵ هێزە نێودەوڵەتییەکان.
لە دوای دەستبەکاربوونی وەک سەرۆکی دەزگاى دژە تیرۆر، جەختی لەسەر گۆڕینی شێوازی کارکردنی دژە تیرۆر کردووەتەوە لە شەڕی بەرەییەوە بۆ ئۆپەراسیۆنی هەواڵگریی ورد، دابەزینی ئاسمانی و ڕاوەدوونانی شانە نوستووەکانی داعش لە ناوچە سەختەکانی وەک زنجیرە چیاکانی حەمرین، وادی شایی و بیابانی ئەنبار.
زەید حوشى مووسەوى، لە نێو دامەزراوەی سەربازیی عێراقدا بە ئەفسەرێکی پیشەگەر و دوور لە ململانێ سیاسی و حیزبییەکان دەناسرێت، کە زیاتر بە پلەبەندیی سەربازی و لێهاتوویی مەیدانی گەیشتووەتە ئەم پۆستە باڵایە.
چەندین جار لە کاتی ئۆپەراسیۆنە سەربازییەکانی دژی داعش بریندار بووە، ئەمەش وایکردووە لە ناو سەرباز و ئەفسەرانی دەزگاکەدا پێگەیەکی جەماوەری و مەعنەویی بەهێزی هەبێت.
ئێستا سەرۆکى دەزگاى دژە تیرۆر گورزێکی بەهێزە بە دەست سەرۆک وەزیرانەوە بۆ لێدان و دەستگیرکردنی ئەو کەسانەی لە دۆسیەی گەندەڵی عەدنان جومەیلییەوە تێوەگلابوون.
لە دۆسیەى جورفولسەخریش سەرۆکى دەزگاى دژە تیرۆرى عێراق، ئەرک و بەرپرسیارێتییەکى گەورەى هەیە و هێزەکەى ڕۆڵى سەرەکى هەیە لە پرۆسەى کۆنترۆڵکردنى جورفولسەخر، کە پێگەی سەرەکی حیزبوڵای عێراقییەو یەکێکە لە ناوچە هەستیار و ستراتیجییەکانی عێراق.
زەیدى دەیەوێت بە پاڵپشتیی دژە تیرۆر و هێزەکانى دیکە، ئەو کارە بکات کە 12 ساڵ بوو وەک نهێنییەک مابوویەوە و کەس خۆى لە قەرەى نەدەدا.