حوسییەکان و سعودیە هەڕەشەی بە ئامانجگرتنی کێڵگە نەوتییەکانی یەکدی دەکەن
پووختەى هەواڵەکە
- شەڕی سعودیە و حوسییەکانی یەمەن پێی ناوەتە قۆناغێکی مەترسیدارەوە.
- هەردوولا هەڕەشەی بە ئامانجگرتنی کێڵگە نەوتییەکان و فڕۆکەخانەکان دەکەن.
- داوا لە خەڵکی سڤیل و کارمەندان دەکەن ئەو ناوچانە چۆڵ بکەن.
- سعودیە بۆ خەڵکى سڤیل: وێستگەی نەوتی سەباحیە لە سەنعا چۆڵ بکەن
تورکی مالیکی، گوتەبێژی وەزارەتی بەرگریی سعودیە، لە تۆڕی ئێکس داوای لە هاوڵاتییانی سڤیل کرد، بۆ سەلامەتیی گیانیان، پێگەکانی نەوتی یەمەن چۆڵ بکەن و نەخشەیەکی بڵاوکردەوە، تیایدا ئەو ناوچانەی بە ڕەنگی سوور دەستنیشانکردبوو کە بەنیازن بە ئامانجی بگرن، چەند کاتژمێرێک دواتر سعودیە هێرشی بۆ سەر وێستگەی نەوتی سەباحیە لە ڕۆژئاوای سەنعا دەستپێکرد.
هۆشداریی حوسییەکان
- حوسییەکانی یەمەن داوایان لە شارەزایان، ئەندازیاران و کرێکارانی سەرجەم دامەزراوە نەوتییەکانی سعودیە کرد، بە مەبەستی سەلامەتییان بەپەلە ئەو ناوچانە بەجێبهێڵن، چونکە بەئامانج دەگیرێن.
- هۆشدارییاندا بە هێڵە ئاسمانییەکان، فڕۆکەخانەکان، سەرنشینەکان و ئەو کارمەندانە لەو دامودەزگایانە کار دەکەن، فڕۆکەخانە و شوێنی کارەکانیان بەجێ بهێڵن.
- حوسییەکان بە ئامانجی شەرعیی خۆیان ناویان دەبەن و بەردەوام دەبن لە بە ئامانج گرتنیان.
ئەوە لە کاتێکدایە، پێشتریش چەندینجار حوسییەکان هێرشی درۆنی و موشەکییان بۆ سەر فڕۆکەخانە و کێڵگە نەوتییەکانی سعودیە، بەتایبەت فڕۆکەخانەی نێودەوڵەتیی مەلیک خالید و کۆمپانیای وزەی ئارامکۆ ئەنجامداوە، دوابەدوای گەمارۆ دەریاییەکانی سعودیە و حوسییەکان لەسەر یەکتر، کە جموجوڵی کەشتیوانییان لە گەرووی بابولمەندەب پەکخستووە و مەترسییان بۆ سەر بازرگانیی جیهانی درووست کردووە، هێرشی سەر کێڵە نەوتییەکان و فڕۆکەخانە و ژێرخانی بازرگانی و سڤیل مەترسیدارترین پێشهاتە لە شەڕی نێوان حوسییەکان و سعودیەدا.
زانیاریی زیاتر بۆ تۆ
هێرشی پێچەوانەى سعودیە دژ بە حوسییەکان دەستیپێکرد
حیزبوڵاى عێراق پشتیوانیی کردەوە سەربازییەکانى حوسییەکانى یەمەن دەکات
هێزەکانی عمالقەی باشوور کێن کە حوسییەکانیان لە گەرووی بابولمەندەب دەرپەڕاند؟
