پووختەى هەواڵەکە:

• خەڵاتی ساخارۆڤ بەرزترین خەڵاتی مافەکانی مرۆڤە لە ئەورووپا.

• پەیوەندى ترەمپ و دادگاى نێودەوڵەتیى تاوان باش نییە.

• پێشتر چەندین کەسایەتى کورد و جیهانى خەڵاتەکەیان وەرگرتووە.

ڕۆبێرتا میتسۆلا، سەرۆکی پەرلەمانی ئەورووپا ڕایگەیاند، خەڵاتی ساخارۆڤ بۆ مافەکانی مرۆڤ بە دادگای نێودەوڵەتیی تاوانەکان بەخشرا، ئەوەش لەکاتێکدایە ئەو دامەزراوەیە سزای ئەمریکای لەسەرە.

سەرۆکی پەرلەمانی ئەورووپا:

• یەکێتیی ئەورووپا لەسەر بنەمای ڕێز لە فرەلایەنی و دامەزراوە نێودەوڵەتییەکان بونیادنراوە.

• ئەم خەڵاتەش دەرخەری ئەو کارە گرنگانەیە کە دادگاکە لە پشتگیریکردنی یاسا نێودەوڵەتییەکان و دادپەروەری کردوویەتی.

تۆمۆکۆ ئەکانی، دادوەری باڵا لە دادگای نێودەوڵەتیی تاوان:

• خەڵاتەکە لەکاتێکدایە کە دادگاکە و بەرپرسەکانیش ڕووبەڕووی ئاڵنگارییەکی بێ هاوتا دەبنەوە.

• بەتایبەت ئەو سزایانەی بە ئامانجی تێکدانی بنەماکانی کاری دادگاکە بڕیاری لەسەر دراوە.

ترەمپ خۆشى لە دادگاکە نایەت

هەر ئەمساڵ دۆناڵد ترەمپ، سەرۆکی ئەمریکا سزای دژ بە سەرۆک و پارێزەرێکی دادگای نێودەوڵەتیى تاواندا سەپاند، هۆکارەکەشی گەڕاندەوە بۆ بە ئامانجگرتنی کەسایەتیی ئەمریکی و هاوپەیمانەکانیان لە ئیسرائیل.

چەند کوردێک خەڵاتەکەیان وەرگرتووە

خەڵاتی زاخارۆڤ بۆ ئازادیی بیروڕا خەڵاتێکی ساڵانەیە لە لایەن پەرلەمانی ئەورووپاوە دەبەخشرێتە ئەو کەسایەتی و ڕێکخراوانەی داکۆکی لە مافەکانی مرۆڤ و ئازادییە بنەڕەتییەکان دەکەن.

چەندین کەسایەتیی کورد ئەم خەڵاتەیان وەرگرتووە لەوانە لەیلا زانا لە ساڵی 1995، نادیە موراد و لەمیعە حەجی بەشار لە ساڵی 2016، ژینا مەهسا ئەمینی لە ساڵی 2023.

بۆ یەکەمجار لە ساڵی 1988 بەخشرا بە نێڵسۆن ماندێلا و ئاناتۆلی مارچێنکۆ، باڵاترین ڕێزلێنانی یەکێتیی ئەورووپایە بۆ هەوڵەکان لە بوارەکانی مافی مرۆڤدا.