پاش ململانێیەکی درێژ لەگەڵ نەخۆشی، تەرمی شاعیری ناسراوی کورد ڕەفیق سابیر گەیشتەوە خاکی نیشتمان و لە زێدی خۆی بە خاک دەسپێردرێت.
ڕۆژی شەممە 25-4-2026، تەرمی ڕەفیق سابیر لە وڵاتی سویدەوە لەسەر ئەرکی نووسینگەی قوباد تاڵەبانی، جێگری سەرۆکوەزیرانی هەرێمی کوردستان گەڕێندرایەوە. ئەمڕۆ یەکشەممە لە هۆڵی ڕۆشنبیریی ڕانیە بە ئامادەیی هەڤاڵ ئەبوبەکر، پارێزگاری سلێمانی و ژمارەیەک لە بەرپرسان و کەسایەتییەکان، مەراسیمێکی ڕێزلێنانی بۆ ئەنجام درا.
بڕیارە پاش مەراسیمەکەی ڕانیە، تەرمی شاعیر لە گۆڕستانێکی قەڵادزێ کە زێدی خۆیەتی بە خاک بسپێردرێت. هەروەها ڕۆژی دووشەممە 27-4-2026، مەراسیمی پرسەکەی لە مزگەوتی ئەحمەدی حاجی عەلی لە شاری سلێمانی بەڕێوەدەچێت.
ڕەفیق سابیر لە ساڵی 1950 لە قەڵادزێ لەدایکبووە و هەر لەوێ خوێندنی سەرەتایی و ئامادەیی تەواو کردووە. لە ساڵانی 1970 تا 1974 لە زانکۆی بەغداد بەشی زمان و ئەدەبی کوردی خوێندووە. لە ساڵی 1982 کوردستانی بەرەو بولگاریا بەجێهێشتووە و لە ساڵی 1987 بڕوانامەی دکتۆرای لە فەلسەفە بەدەستهێناوە، پاشان لە ساڵی 1989ـەوە لە وڵاتی سوید نیشتەجێ بووە.
ئەم شاعیرە لە ساڵانی حەفتاکانەوە دەستی بە نووسین کردووە و یەکەم بەرهەمی بەناوی "پشکۆکان دەگەشێنەوە" لە ساڵی 1976 بڵاوکردووەتەوە. خاوەنی شیعری ناسراوی "لاوکی هەڵەبجە"یە و دەیان کتێبی لە بوارەکانی شیعر، زمانەوانی و وتاری سیاسی نووسیوە. هۆنراوەکانی بۆ 9 زمانی جیاوازی وەک عەرەبی، ئینگلیزی، فەڕەنسی و سویدی وەرگێڕدراون.
ڕەفیق سابیر چەندین خەڵاتی گرنگی وەک خەڵاتی ئەدەبیی "کلاس دی ڤیلدێ"ی سویدی و خەڵاتی "مامۆستا ئیبراهیم ئەحمەد"ی پێدراوە. لە کۆتاییەکانی ساڵی ڕابردوو تووشی نەخۆشیی شێرپەنجە بوو، پاش ململانێ لەگەڵ نەخۆشییەکە، لە ڕێکەوتی 28-2-2026 لە شاری ستۆکهۆڵمی سوید کۆچی دوایی کرد.
