
پەروەردەی سلێمانی هۆشدارى لە گرتنەبەرى ڕێکار دەکات لەبەرامبەر وەرگرتنى پارە لە خوێندکاران.
پەروەردە بڕیاریداوە داهاتى فرۆشگەکان بۆ خەرجیی خوێندنگەکان بێت.
پەروەردە لەو بڕوایەدایە پارەى فرۆشگە بەشى پێداویستى خوێندنگە دەکات و کۆکردنەوەى کۆمەک پێویست نییە.
بەڕێوەبەرایەتیی گشتیی پەروەردەی سلێمانی بە نووسراوێکی فەرمی، کۆکردنەوەی پارە لە قوتابیان و خوێندکاران لەژێر هەر ناونیشان و پاساوێکدا قەدەغە دەکات و هۆشداریش دەدات لە گرتنەبەری ڕێکاری توند بەرامبەر سەرپێچیکاران.
لە بەشی خزمەتگوزاریی بەڕێوەبەرایەتیی گشتیی پەروەردەی سلێمانییەوە، (17ـی تشرینی دووەمی 2026) نووسراوێک دەرچووە.
ئاڕاستەی سەرجەم بەڕێوەبەرایەتییەکانی پەروەردەی (ڕۆژهەڵات، ڕۆژئاوا، شارباژێڕ، پێنجوێن، سەیدسادق، شارەزوور، قەرەداغ، چەمچەماڵ، دوکان و دەربەندیخان) کراوە.
تێبینی کراوە لە بەشێک لە ناوەندەکانی خوێندن، بە ناوی ئەنجوومەنی دایکان و باوکانەوە زیادەڕۆیی دەکرێت لە کۆکردنەوە و دیاریکردنی بڕی پارە وەک کۆمەک بۆ پاڵپشتیی قوتابخانە و خوێندنگەکان.
لە نووسراوەکەدا کە واژۆی نەژاد عەبدوڵڵا محەمەد، بەڕێوەبەری گشتیی پەروەردەی سلێمانی بە وەکالەت لەسەرە، هاتووە: "بۆ ساڵی خوێندنی (2026-2027) پارەی فرۆشگە (حانووت) بۆ خودی قوتابخانە و خوێندنگەکانە، بۆیە ڕێپێدراو نییە لەژێر هیچ ناونیشانێک یان هەر پاساوێک بۆ هەر مەبەستێک پارە لە قوتابیان و خوێندکاران کۆبکرێتەوە، یان ناچار بکرێن بڕێک پارە بدەن لە ڕێگەی دایک و باوکیانەوە".
پەروەردەی سلێمانی دەشڵێت "هەر ناوەندێکی خوێندن پابەندی ئەم بڕیارە نەبێت، بە پێچەوانەوە بەرپرسیارێتیی توندی لەسەر دەبێت".
وەزیرى پەروەردە: نابێت ژمارەى مامۆستا لە لاى هەموو کەسێک هەبێت
