
دوران کاڵکان ڕەخنەى لە دەسەڵاتى تورکیا هەیە بەوەى هەنگاو نانێت
دوران کاڵکان ئاماژە بەوەدەکات ئەگەریان بۆ پێکدادان لەگەڵ تورکیا نەهێشتووەتەوە و هەنگاوی دیکە نەماوە بینێن.
لەگەڵئەوەشدا بەرپرسانى باڵاى تورکیا جەخت لەسەرخستنى پڕۆسەکە دەکەنەوە.
دوران کاڵکان، ئەندامی ئەکادیمیای زانستە کۆمەڵایەتییەکانی عەبدوڵا ئۆجەلان، لە دیمانەیەکدا لەگەڵ "مەدیا خەبەر" دەڵێت، تەنیا بە ئازادیی ئۆجەلان و باشکردنی دۆخی پڕۆسەکە دەچێتە پێشەوە و سەردەکەوێت.
تورکیا لە ئاستی پڕۆسەکەدا هەنگاو نانێت و دەرفەت بە ئۆجەلان نادات بە باشی کار لەسەر پرۆسەکە دەکات.
هیچ گۆڕانکارییەکیش لە پێگەی ئۆجەلاندا نەکراوە.
ئەگەر تورکیا پلانی هێرشکردنی نەبێت، بە جۆرێک کشاوینەتەوە هیچ ئەگەرێک بۆ پێکدادان نەماوەتەوە.
هیچ هەنگاوێکی دیکە نەماوە بینێن و ئێستا کاتی ئەوەیە تورکیا هەنگاو بنێت.
پێویستە پێگەی ئۆجەلان دیاری بکرێت، ئەو لیژنەیە دەستبەکاربێت کە ئۆجەلانی تێدایە و هەنگاو بۆ دیموکراتیزەکردن بنرێت.
پێویستە ئەو ئەندامانەی پەکەکە چەکدادەنێن و دەگەڕێنەوە بۆ تورکیا، دەرفەتی سیاسەتکردنیان هەبێت و ژیانیان گرەنتی بکرێت.
هەنگاوەکانمان دەریخست کە جددین لەسەر پرۆسەکە و قسەکانی ئەو کەسانە ڕاست دەرنەچوو پەکەکەیان بە دژی پڕۆسەکە دادەنا.
لە ماوەی دوو ساڵی ڕابردوودا ژمارەیەک لەو زیندانیکراوانەی لەسەر دۆسیەی پەکەکە لە زینداندان گیانیان لەدەستداوە و کاڵکان ئەو کەسانە بە "شەهیدی بزوتنەوەکەیان و شەهیدی زیندان" ناودەبات و دەڵێت، ڕاستە لە شاخ خەباتیان ڕاگرتووە، بەڵام دەوڵەتی تورکیا لە جەنگدایە لەگەڵ زیندانیکراواندا.
دەربارەی کۆمەڵکوژی دێرسیم و ئەو کارەساتانەی بەسەر کورد دا هاتووە کاڵکان دەڵێت، پێویستە دەوڵەتی تورکیا دان بەو برینە قووڵەدا بنێت لە سەرەتای تەمەنی کۆماری تورکیا لە دێرسیم ڕوویدا و قبوڵی بکات.
کاڵکان گوتیشى "کورد و سەرکردە شۆڕشگێڕەکانی کورد کێشەیان لەگەڵ دروستبوونی کۆماری تورکیادا نەبووە و سیاسەتی تورکیا لە ساڵانی دواتر کێشەکانی دروستکرد".
