بەرەبەیانی ئەمڕۆ سێ سەگی بێلانە هێرشیان کردە سەر هێرش سەید سەلیم، جێگری بەڕێوەبەری تەندروستیی سلێمانی و بەهۆیەوە ناوبراو بریندار بوو. هێرش سەید سەلیم، دوای وەرگرتنی چارەسەر، هۆشداری دەدات لە مەترسییەکانی گەستنی سەگ و جەخت لەسەر وەرگرتنی ڤاکسین دەکاتەوە.
بەرەبەیانی ئەمڕۆ، لە کاتێکدا هێرش سەید سەلیم، جێگری بەڕێوەبەری تەندروستیی سلێمانی بۆ وەرزشکردن چووبووە دەرەوە لە ناو پرۆژەیەکی نیشتەجێبووندا، سێ سەگی بێلانە پەلاماریان داوە و قاچی بریندار بووە.
دکتۆر هێرش دوای رووداوەکە راستەوخۆ چووەتە نەخۆشخانە و چارەسەری پێویستی وەرگرتووە. ئەو بە کەناڵ8ی راگەیاند، کە ڤاکسینی دژە گەستنی سەگی لە نەخۆشخانە وەرگرتووە. ناوبراو جەختی لەوە کردەوە، کە "برینی گەستنی سەگ ئەگەر زۆر بچووکیش بێت مەترسیدارە و ئەگەر چارەسەر وەرنەگیرێت ئاکامەکەی خراپ دەبێت." لە هەمان کاتدا خۆشحاڵی خۆی دەربڕی کە ڤاکسینی دژە گەستنی سەگ لە نەخۆشخانە بەردەست بووە.
