قایمقامی قەزای چەمچەماڵ پلانی ئاوەدانکردنەوەی ناوچەکە و خەرجکردنی بودجەی ماوەی هاوکارییەکانی لافاو بۆ پڕۆژە خزمەتگوزارییەکان و چارەسەری کێشەی کەمئاوی ڕادەگەیەنێت.
ئاسۆ بەکر، قایمقامی چەمچەماڵ ڕایگەیاند، هەنگاویان ناوە بۆ گەشەپێدانەوە و ئاوەدانکردنەوەی ناوچەکە. لە هەنگاوی یەکەمدا بڕیاردراوە بە کڕینی کۆمەڵێک ئۆتۆمبێل و ئامێری گەورە بە بەهای 1 ملیار و 300 ملیۆن دینار، کە بۆ خزمەتکردنی چەمچەماڵ و شارۆچکەکانی دەوروبەری بەکاردەهێنرێن.
سەبارەت بەو بڕە پارەیەی لە هاوکارییەکانی لافاو ماوەتەوە، قایمقامی چەمچەماڵ ئاماژەی بەوە کرد کە هەموو شارەوانییەکانی دەوروبەری قەزاکەیان ئاگادار کردووەتەوە تاوەکو بە بڕی 600 ملیۆن دینار پڕۆژە ئامادە بکەن بۆ ئەوەی لە دوای جەژن دەست بە جێبەجێکردنیان بکرێت. ئەو پارەیەی دەمێنێتەوە بۆ ڕەواندنەوەی مەترسییەکانی لافاو، قیرتاوکردن و کۆنکرێتکردنی گەڕەکەکانی چەمچەماڵ و شۆڕش تەرخان دەکرێت.
لەبارەی گرفتی کەمئاوی لە ناوچەکە، ئاسۆ بەکر ڕایگەیاند، نووسراوێکی فەرمیان ئاراستەی شارەوانی سلێمانی کردووە بە مەبەستی ڕاگەیاندنی تەندەرین بۆ پڕۆژەی ئاوی چەمچەماڵ. قایمقام دڵنیایی دایە دانیشتووانی چەمچەماڵ و شۆڕش کە لە وەرزی هاوینی ئەمساڵدا، پلان وایە لانیکەم هەر 5 بۆ 6 ڕۆژ جارێک ئاوی خواردنەوە بەسەر ماڵاندا دابەش بکرێت.