پارێزگاى هەولێر : بەهۆی نەگۆڕینی ناوەکەیەوە بارەگای سەرەکیی هاوپەیمانیی نیشتمانی لە هەولێر داخراوە

پووختەی هەواڵەکە

  • پارێزگاى هەولێر دەڵێت، بەهۆى نەگۆڕینى ناوەوە بارەگاکەى هاوپەیمانیمان داخستووە.

  • هاوپەیمانیى نیشتمانى: داخستنى بارەگاکەمان پێچەوانەى یاسایە .

  • سەرۆکى هاوپەیمانییەکە: پارتى دیموکراتى کوردستان دەخەینەژێر بەرپرسیارێتى.


پارێزگاى هەولێر ڕوونکردنەوەیەکى لەبارەى داخستنى بارەگاى سەرەکى هاوپەیمانیى نیشتمانى بڵاوکردەوە و جەخت لەسەر ئەوە دەکاتەوە، بەهۆى نەگۆڕینى ناوى هاوپەیمانییەکە بووە.


بۆچی بارەگای حیزبێک داخراوە ؟

  • ڕۆژى پێنجشەممە، هاوپەیمانیى نیشتمانى، داخستنى بارەگاى سەرەکى حیزبەکەى لە شارى هەولێر لەلایەن هێزە ئەمنییەکانەوە ڕاگەیاند و داواى لە پارتى دیموکراتى کوردستان و وەزارەتى ناوخۆ کرد، دەستبەجێ ئەو کارە ڕابگرن.

  • هاوپەیمانییەکە جەخت لەسەر ئەوە دەکاتەوە، بەبێ هیچ پاساوێک ئەم کارە نایاساییە ئەنجام دراوە.

  • داخستنى بارەگاى سەرەکى هاوپەیمانییەکەى بە پێچەوانەی یاسا ناو دەبەن و هۆشدارى ئەوەیاندا، ڕێکاری یاسایى دەگرنەبەر.

پارێزگاى هەولێر ڕوونکردنەوەیەکى لەبارەى داخستنى بارەگاى سەرەکى هاوپەیمانیى نیشتمانى بڵاوکردەوە:

  • لە 17ـی مانگی ئەیلوولى ئەمساڵ، وەزارەتی ناوخۆی هەرێمی کوردستان فەرمانێکی وەزاری دەرکردووە، بەگوێرەی یاسای حیزبەکانی هەرێمی کوردستان ژمارە 17ـی ساڵی 1993ـی هەموارکراو و بە واژۆی وەزیری ناوخۆ، فەرمان کراوە، "ناوی هاوپەیمانی نیشتمانی بۆ هاوپەیمانیی دەنگی نیشتمانی بگۆڕێت و لە ڕۆژی دەرچوونی فەرمانەکەوە جێبەجێ بکرێت.

  • لە نووسراوێکی دیکەدا کە 8ـی ئەم مانگە بۆ پارێزگای هەولێر نێردراوە، وەزیری ناوخۆ داوای کردووە، لەسەر داوای پارتی (هاوپەیمانیی دەنگی نیشتمان) بارەگاکانی هاوپەیمانیی نیشتمانی لە هەولێر و سلێمانی دابخرێن.

  • دوای نووسراوی وەزیری ناوخۆ، پارێزگاری هەولێر ڕۆژى 18ـی ئەم مانگە، نووسراوێکی بۆ ئاسایش و پۆلیسی هەولێر کردووە و تێیدا داوا دەکات، بۆ جێبەجێکردنی فەرمانی وەزیری ناوخۆ، کاری پێویست ئەنجام بدەن.

  • بۆ جێبەجێکردنی فەرمانی وەزارەتی ناوخۆ، پارێزگاری هەولێر هێزێکی هاوبەش لە نوێنەری کاروباری ناوخۆی پارێزگاو پۆلیس و ئاسایشی ڕاسپارد، بارەگاکە دابخەن.

هاوپەیمانیی نیشتمانی حیزبێکی سیاسییە لە هەرێمی کوردستان و لە ئێستادا لەلایەن دڵشاد بابانەوە سەرۆکایەتی دەکرێت.

حیزبەکە لە سەرەتادا بە ناوی (هاوپەیمانی بۆ دیموکراسی و دادپەروەری) لەلایەن ژمارەیەک کەسایەتى سیاسییەوە دامەزرا و لەلایەن بەرهەم ساڵحەوە سەرۆکایەتى دەکرا، دواتر ناوەکەی گۆڕدرا بۆ (هاوپەیمانیی نیشتمانی) و دوای گۆڕینی ناوەکەی، حیزبەکە لەلایەن ئارام قادرەوە سەرۆکایەتی دەکرا و دواتر دەستیلەکارکێشایەوە، پاشان دڵشاد بابان بووە سەرۆکی حیزبەکە.

ڕۆژی پێنجشەممەى ڕابردوو هێزێکی ئەمنی چوونە سەر بارەگای سەرەکی حیزبەکە لە پارێزگای هەولێر و داوایان کردووە ئۆفیسەکە چۆڵ بکرێت و دایانخستووە.

زانیاریی زیاتر بۆ تۆ

شۆڕش محەمەد

Fri Nov 20 2026

Loading related news...