
مامۆستا و فەرمانبەرانى گرێبەست: ئەگەر مووچەکانمان دابەشنەکرێت خۆپیشاندان دەستپێدەکەین.
مامۆستا و فەرمانبەرانى گرێبەست ژمارەیان 52 هەزار کەسە.
وەک ناڕەزایى دەربڕین لەبەرامبەر دواکەوتنى مووچەکانیان، مامۆستا و فەرمانبەرانى گرێبەست هەڕەشەى خۆپیشاندان دەکەن و دەڵێن: ئەگەر تاوەکو ڕۆژى یەکشەممەى داهاتوو مووچەى مانگى تشرینى یەکەمیان پێنەدرێت، لەبەردەم باڵەخانەى ئەنجوومەنی وەزیران خۆپیشاندان و ناڕەزایى دەستپێدەکەن.
وەک مامۆستا و فەرمانبەرانى گرێبەست کە ژمارەیان 52 هەزارە، بەردەوام لە خزمەتی پڕۆسەی پەروەردە و فێرکردن و دامودەزگاکانی حکومەتدان، بە نیگەرانییەکی قووڵەوە دەڕواننە دواکەوتنی بەردەوامی مووچەکانیان.
زیاتر لە 50 ڕۆژ تێپەڕیوە بەسەر دابەشنەکردنی مووچەکانیاندا.
تاوەکو ئێستا مووچەی مانگی تشرینی یەکەمیان وەرنەگرتووە.
ئەم شێوازە لە مامەڵەکردن لەگەڵ توێژی مامۆستا و فەرمانبەران، دوورە لە هەموو پێوەرێکی کارگێڕی و دادپەروەری و مایەی قبوڵکردن نییە، چونکە پێشێلکردنی مافە سەرەتاییەکانی ژیان و گوزەرانیانە.
هۆشدارییش لە دواکەوتنى زیاتری مووچەکانیان دەدەن و دەڵێن: ئەگەر تاوەکو ڕۆژی یەکشەممەی داهاتوو وادەی دابەشکردنی مووچەکانیان ڕانەگەیێنرێت و دابەش نەکرێت، ئەوا بە شێوەیەکی مەدەنییانە و بە بەشداری سەرجەم گرێبەستەکان، خۆپیشاندان و گردبوونەوەی فراوان لەبەردەم باڵەخانەى ئەنجوومەنی وەزیران ئەنجام دەدەن.

