ئەمریکا 500 مووشەکی پاتریۆت بە ئۆکرانیا دەفرۆشێت
پووختەى هەواڵ
سەرەڕاى ناکۆکییەکانى نێوان ترەمپ و زێلێنسکى ئەمریکا لە هاوکارییەکانى بۆ ئۆکرانیا بەردەوامە.
هێرشەکانى ڕووسیا و ئۆکرانیا بۆ سەر یەکدى چڕبوونەتەوە.
ئۆکرانیا لە جەنگەکەیدا پشتى بە هاوکارییە سەربازییەکانى ئەمریکا و ئەورووپا بەستووە.
وەزارەتی دەرەوەی ئەمریکا، ڕەزامەندی ئیدارەی دۆناڵد ترەمپی بۆ فرۆشتنی 500 مووشەکی پاتریۆت بە ئۆکرانیا ئاشكراکرد، لەگەڵ ئەوەشدا پرۆسەکە پێویستی بە ڕەزامەندی کۆنگرێس هەیە.
وەزارەتی دەرەوەی ئەمریکا:
لە ئەگەری جێبەجێکردنی ئەم ڕێککەوتنە، کیێڤ دەتوانێت بە بەکارهێنانی ئەو مووشەکانە وەڵامی هەڕەشەکانی ئێستا و داهاتووش بداتەوە.
ئەم پرۆسەیە پاڵپشتیکردنی ئامانجە سیاسیی و ئەمنییە نیشتیمانییەکانی واشنتنە بۆ گەڕانەوەی سەقامگیری بۆ ئەورووپا.
ڤۆلۆدیمیر زێلێنسکی، سەرۆکی ئۆکرانیا لە تۆڕی کۆمەڵایەتیی ئێکس:
پڕۆسەی ناردن و وەرگرتنی ئەو مووشەکانە چەند ساڵێک دەخایێنێت.
داوا لە واشنتن دەکەم چارەسەرێکی خێرا بدۆزێتەوە.
وڵاتەکەم ئێستا ڕووبەڕووی مەترسی ڕاستەقینە بووەتەوە.
پێویستی بەو مووشەکانەیە کە بەرپەرچىی هێرشەکان دەدەنەوە.
زێلێنسکی لەپۆستەکەیدا پێشنیازی ئەوە دەکات هەر یەک لە ئەمریکا و هاوپەیمانەکانی لە ئەورووپا، لە کۆگاکانی ئێستایان هاوکاریی سەربازیی بدەنە وڵاتەکەیان و لە دوایدا لە ڕێگەی گرێبەستی دیکە قەرەبووی ئەو چەک و مووشەکانە بکرێتەوە.
مووشەکی پاتریۆت دیارترین ئەو چەکانەیە کە کیێڤ بۆ ڕێگری لە هێرشەکانی ڕووسیا بۆ سەر وڵاتەکەی پشتی پێدەبەستێت.
ڕاگەیاندنەکەی وەزارەتی دەرەوەی ئەمریکا لە کاتێکدا هەر ئەم مانگە گرژیی و ئاڵۆزی لە پەیوەندییەکانی نێوان هەر یەک لە واشنتن و کیێڤ درووستبوو، بەهۆی ئەو ڕێککەوتنە نوێیەی لە نێوان واشنتن و مۆسکۆ لەسەر دیزڵ کرا.
