بوونی خوێن لە پیساییدا بەشێوەیەکی گشتی دەکرێت نیشانەی بوونی چەند نەخۆشییەک بێت لە کەسەکەدا، بەشێک لە هاونیشتمانییان کە خوێن دەبینن لە پیساییەکەیاندا تووشی دڵەڕاوکێ دەبن و دەڵێن '' تووشی نەخۆشییەکی مەترسیدار بووین'' ، د.سیروان حەمە شەریف، ڕاوێژکار لە نەشتەرگەریی گشتی، ڕێنوێنیی هاونیشتمانییان دەکات کە هەموو کاتێک بوونی خوێن لە پیساییدا، نیشانەی بوونی نەخۆشییەکی مەترسیدار نییە و ئەو حاڵەتانە دەخاتەڕوو کە پێویستە هاونیشتمانییان تێیدا سەردانی پزیشكی پسپۆڕ بکەن.

''لە ئەم حاڵەتانەدا سەردانی پزیشكی پسپۆڕ بکرێت ''

پزیشکە پسپۆڕەکە دەڵێت '' بوونی خوێن لە پیساییدا لە ئەم حاڵەتانەدا جێی مەترسییە''، لەوانە:

1. ڕەنگی خوێنەکە تاریک(ڕەش) بێت
2. زیاد لە چەند جارێک خوێن لە پیساییەکەدا هەبێت
3. لەگەڵ بوونی خوێن لە پیساییەکەدا کەسەکە نیشانەکانی: کەمخوێنی، لاوازبوون و دابەزینی کێشی جەستەی هەبێت
4. تەمەنی کەسەکە سەروو 45-50 ساڵان بێت
5. گۆڕانی هەمیشەیی لە کات و جۆری پیسایی

''دەکرێت هۆکارەکەی مایەسیری یان درزی کۆم بێت''

پزیشکەکە دەڵێت ''زۆرجار لە کەسانی گەنج ئەگەر خوێنەکە ڕەنگی سوور بێت و لەسەر پیساییەکە بێت، دەکرێت هۆکارەکەی بوونی مایەسیری یان درزی کۆم بێت، ئەگەر حاڵەتی بوونی خوێن لە پیساییەکە دووبارە بووەوە، پێویستە کەسەکە سەردانی پزیشکی پسپۆڕ بکات''.