دوای بەدواداچوونەکانی کەناڵ8 بۆ زۆربوونی سەگە بێلانەکان لە شەقام و کۆڵانەکان، سەرۆکایەتیی شارەوانیی سلێمانی هەڵمەتێکی بۆ کۆکردنەوەی سەگە بێلانەکان بۆ ماوەی هەفتەیەک راگەیاند و هەر کەس هاوکارییان بکات لە کۆکردنەوەی سەگە بێلانەکاندا پاداشت دەکرێت و بۆ ئەوەش ژمارەیەکی پەیوەندییان داناوە، کە لە کۆتایی ئەم هەواڵدا بۆ هاونیشتمانیان دانراوە.

پاداشت بۆ کۆکردنەوەی سەگی بێلانە

بەگوێرەی راگەیەندراوێکی سەرۆکایەتیی شارەوانیی سلێمانی، سبەینی 20ـی ئەیلولی 2025 هەڵمەتەکە دەستپێدەکات و مەرجە لە سنووری شارەوانیی سلێمانی بێت و هەر سەگێک بەچکەی هەبێت، لەگەڵ بەچکەکانیدا رادەست بە شێڵتەرەکە بکرێت، بەرامبەر بە رادەستکردنیان بە شێلتەرەکە بڕی سێ هەزار دینار پاداشت دەدرێت بەو کەسانە، ئەگەر لەشوێنێک کۆبکرێنەوە و دواتر رادەستی تیمەکانی کۆکردنەوەی سەگ بکرێن، بڕی دوو هەزار دینار بۆ هەر سەگێک پاداشت دەدرێت.

شێڵتەرەکە لە سنووری گوندی رازیانەیە لە نزیک عەربەت

سەرۆکایەتیی شارەوانیی سلێمانی ژمارە تەلەفۆنێکی بڵاوکردووەتەوە، تاوەکو هاونیشتیمانیان پەیوەندییان پێوەبکەن و راشیانگەیاندووە، کە شوێنی شێڵتەرەکە، لە رازیانە، نزیک بازگەی عەربەتە.

کۆکردنەوەی سەگ چڕترکراوەتەوە

هەروەها شارەوانیی سلێمانی باسی ئەوەیکردووە، کە کارەکانی تیمەکانی کۆکردنەوەی سەگ و رادەستکردنەوەی بە شێڵتەرەکە چڕتر کراوەتەوە، تاوەکو بتوانرێت بە کەمترین ماوە زۆرترین سەگ کۆبکرێتەوە لە شەقام و کۆڵانەکان لە لایەن ئەو کەسانەی کە شارەزاییان لە گرتنی سەگدا هەیە.

داوا لە ئاژەڵدۆستان و رێکخراوەکان

هاوکات داوا لە لە ئاژەڵدۆستان و رێکخراوەکانی تایبەت بە پاراستنی ئاژەڵان دەکەن، پشتیوان و هاوکاریان بن لەم هەڵمەتەدا کە سودی بۆ بەرژەوەندی گشتی و پاراستنی تەندروستی و گیانی هاونیشتیمانیان هەیە.

دوای بەدواداچوونی کەناڵ8

ئەم راگەیەندراوەی شارەوانی سلێمانی دوای ئەو هەڵمەتی بەدواداچوونەی کەناڵ8 دێت بۆ دۆسیەی سەگەبێلانەکان کە ماوەیەکە بەهۆی زیادبوونیانەوە لە شەقام و کۆڵانەکاندا دەستپێکراوە و خۆشبەختانە شارەوانیی سلێمانی بەزووترین کات بەدەم داواکاریی هاونیشتیمانیانەوە هاتن، کە لە رێگەی کەناڵ8ەوە داواکارییەکانیان گەیاندبوو.

ژمارەی پەیوەندی

 تۆش ئەگەر شارەزایت لە گرتن و رادەستکردنی سەگە بێلانەکاندا هەیە دەتوانیت پەیوەندی بەم ژمارە تەلەفۆنەوە بکەیت 07719914460.