پووختەى هەواڵەکە

• کەناڵ8 ڕووماڵێکى گەورەى فێستیڤاڵى هەنار دەکات.

• ستەیجى تایبەت دادەنێت و گەشتیاران دەتوانن بۆ وەرگرتنى خەڵات ناویان تۆماربکەن.

• لە چوار ڕۆژى فێستیڤاڵەکەدا چوار ئایفۆنى 18ـى پرۆماکس دەکاتە دیاری.

ئەمساڵ هاوشێوەى ساڵانى ڕابردوو، کەناڵ8 بایەخێکى گەورە بە فێستیڤاڵی هەناری هەڵەبجە دەدات، لەو چوارچێوەیەدا ئایفۆن و هەنار دەکاتە دیارى.

دیارییەکانى کەناڵ8:

• لە هەژمارى فەرمیى کەناڵ بنووسە "کەناڵ8" ناوت دەچێتە تیروپشکەوە.

• بۆ هەر ڕۆژێک ئایفۆنێکى18 پرۆماکسى مارۆنى دەردەچێت.

• هەر هاونیشتمانییەک لە ستەیجى کەناڵ8 ناوى خۆى تۆمار بکات ئەوا دەبێتە خاوەنى سندوقێکى گەورەى هەنار.

ئەم هەنگاوەى کەناڵ8 بۆ پشتگیرى لە باخەوان و جووتیارانى پارێزگاى هەڵەبجەیەو ساڵانى ڕابردووش گرنگى تایبەت بە فێستیڤاڵەکە داوە.

فەرەیدوون نامدار، خاوەنى براندى هەنارى سازان ئاماژەى بەوەشکرد، ڕۆڵى قوباد تاڵەبانى لە پێشخستنى کەرتى کشتوکاڵ و فێستیڤاڵی هەنارى
هەڵەبجە بەرزدەنرخێنن و سوپاسى هاوکارییەکانى دەکەن. گوتیشى "زیاتر لە 273 باخەوان لە هاوکارییەکانى سوودمەندبوون و نەمامێکى زۆرى هەنارییان ناشتووە.

فەرەیدوون نامدار، خاوەنى براندى هەنارى سازان، بەکەناڵ8ـى ڕاگەیاند، کاری باشیان بۆ بەرزکردنەوەى ئاستى بەرهەمهێنانى هەنار کردووە و توانیویانە لە ساڵى 2023ـەوە تاوەکو ئێستا زیاتر لە 250 هەزار نەمام بچێنن. گوتیشى "ئێستا ئاستى بەرهەمهێنانى هەنار لەسەر ئاستى جیهان لە پلەى چوارەمدایە". داواشیکرد فێستیڤاڵەکە بکرێت بە نێودەوڵەتى و گرنگى زیاترى پێبدرێت.

پووختەى هەواڵەکە

• هەڵەبجە 10,600 دۆنم باخە هەنارى هەیە.

• 2,200 باخەوان لە پارێزگاى هەڵەبجە لە باخە هەناردا کار دەکەن.

• هەنار و بەرهەمەکانى لە فێستیڤاڵەکەدا نمایش دەکرێت.
  

ستار مەحموود بەڕێوەبەرى کشتوکاڵى هەڵەبجە، بە کەناڵ8ـى ڕاگەیاند، 10 هەزارو 600 دۆنم باخە هەناریان هەیە و بۆ ئەمساڵ بەرهەم بۆ نزیکەى 20 هەزار تۆن کەمیکردووە، لەکاتێکدا ساڵى ڕابردوو نزیکەى 30 هەزار تۆن بووە.

بەڕێوەبەرى کشتوکاڵى هەڵەبجە:

•  ئەمساڵ بەهارێکى زۆر فێنکى هەبوو هەنار لەکاتى خۆیدا گوڵى نەکرد.

• هەنار پێویستى بە پلەیەکى گەرم هەیە، ئەو پلە گەرمە نەبوو بۆ ئەوەى هەنار لە کاتى خۆیدا گوڵ بکات.

• هەربۆیە بەرهەمى هەنارى ئەمساڵ یەک لەسەر سێ کەمبووەتەوە بەراورد بە ساڵى ڕابردوو.

• بەردەوام ڕێنمایی و شێوازى نوێى بەخێوکردنى هەنار و پێگەیاندنى دەدرێت بە باخەوانان.

• هەڵەبجە خۆى باخەوانى زۆر زۆر باشى هەنارى تێدایە.

• بەردەوام خولەکانى ڕێنمایی بۆ باخەکانى هەنار و شێوازى نوێى کشتوکاڵى لەو خولانە دەدرێت.

لە پارێزگاى هەڵەبجە ئەمساڵ نرخى یەک کیلۆ هەنار لە 250 -500 دینار تاوەکو هەزار و 500 دینارە، بەگوێرەى جۆرەکانى گۆڕانى بەسەردا دێت.

پووختەى هەواڵەکە:

• هاتووچۆى هەڵەبجە ئامادەکاریى بۆ بەڕێوەچوونى فێستیڤاڵى هەنار کردووە.

• دوایین کۆبوونەوەى ئامادەکاریى کرا و بەڕێوەبەرى هاتووچۆ ڕێنمایى ئەفسەر و پۆلیسەکانى کرد.

• بەڕێوەبەرى هاتووچۆى هەڵەبجە پێشبینى کرد نزیکە نیو ملیۆن گەشتیار سەردانى فێستیڤاڵەکە بکەن.

ئەمڕۆ سێشەممە، ڕێباز کەمال بەڕێوەبەری هاتووچۆی پارێزگای هەڵەبجە، کۆبوونەوەیەکی تایبەتی لەگەڵ ئەفسەر و کارمەندانی بەڕێوەبەرایەتییەکەى کرد و چەند ڕێنماییەکى پێدان و داواشى کرد تاوەکو دەتوانن پەنا بۆ سزادانى شۆفێران نەبەن.

بەڕێوەبەری هاتووچۆی پارێزگای هەڵەبجە بۆ ئەفسەران:

• ​ ئەرکی ئەمجارەتان قوورستر و گەورەترە.

• ئەرکەکانتان بە ڕێکوپێکی و دوور لە ڕەفتاری هەڵچوون و دەمارگیریی جێبەجێ بکەن.

• ڕێکخستنی هاتووچۆی شەقامەکان و ڕێزگرتن لە میوانان، گەشتیاران و ئاسانکاری لە پێشینەی کارەکانتان بێت.

• ​ پێشبینی دەکرێت نزیکەی نیو ملیۆن گەشتیار لەم چەند ڕۆژەدا سەردانی پارێزگای هەڵەبجە بکەن.

• پیاوانی هاتووچۆ زیاتر لە هەموو کاتێک ڕۆڵی کاریگەریان پێدراوە و بەردەوام لەسەر شەقامەکان دەبن تاوەکو زۆرترین کارئاسانی بۆ شۆفێران بکەن.

• تاوەکو دەکرێت دەست بۆ سزادان نەبەن، ئەمەش بە ئامانجی کەمکردنەوەی قەرەباڵغی و سەرخستنی ئەم چالاکییە گرنگە ئابووری و گەشتیارییەی پارێزگاکە.

پووختەى هەواڵەکە:

• سبەى 12ـەمین فێستیڤاڵی هەنار لە هەڵەبجە دەستپێدەکات.

• ئامادەکارییەکان تەواوبوون و خاوەنکار و کاسبکارەکان بەرهەمەکانیان دەگەیێننە پارکەکە.

• چاوەڕوان دەکرێت ئەمساڵ زیاتر لە 300 هەزار کەس سەردانى فێستیڤاڵەکە بکە.

سبەى دوازدەیەمین فێستیڤاڵی هەنار لە هەڵەبجە دەستپێدەکات و ماوەی چوار ڕۆژ بەردەوام دەبێت، لەسەر ڕێنمایى ئیدارەی فیستیڤاڵەکە کاسبکار و ژنانى دەستڕەنگین دەستیان بە ئامادەکردن و ڕازاندنەوەى کەپرەکانیان کرد.

ئیدارەی فیستیڤاڵی هەنار:

• ئەو خاوەنکارانەى پێویستیان بە کارەبا هەیە، کێبڵ و جۆزەی ئامادەکراو بهێنن، کارەبایان بۆ دابین دەکەین.

• لە ئەمڕۆوە بەشداربووان دەتوانن بەرهەم، کەلوپەل و کەرەستەکانیان ببنە ناو پارکی هەڵەبجە و کەپرەکانیانی پێ بڕازێننەوە.

• لە فێستیڤاڵى ئەمساڵ گرنگیى تایبەت بە چالاکیى ژینگەیى دەدرێت و هەڵمەتى ناشتنى پێنج هەزار نەمامى هەناریش بەڕێوەدەچێت.

شوێنى فێستیڤاڵەکە:

• دوانزەیەمین فێستیڤاڵی هەنار لە پارکی شاری یاریی هەڵەبجە بەرێوەدەچێت.

• نزیکەی 552 باخەوان، خاوەنکار و ژنانی دەستڕەنگین بەرهەمە کشتوکاڵی و دەستییەکانیان نمایش دەکەن.

• فێستیڤاڵەکە بەسەرپەرشتی پارێزگاری هەڵەبجە، بە هاوبەشی لەنێوان بەڕێوەبەرایەتیی گشتیی کشتوکاڵ و تۆڕی ڕێکخراوەکان، بەڕێوەبەرایەتیی گشتیی گەشتوگوزار ڕێکخراوە.

ساڵی ڕابردوو 11ـەمین فێستیڤاڵی هەنار و پایزی هەڵەبجە لە 30ـی تشرینی یەکەمی 2025 دەستپێکرد و سێ ڕۆژ بەردەوام بوو، لەو ماوەیەدا زیاتر لە 270 هەزار کەس سەردانیان کرد، بۆ ئەمساڵیش پێشبینی دەکرێت ڕێژەکە بۆ زیاتر لە 300 هەزار کەس بەرزبێتەوە.

پووختەى هەواڵەکە:

• 28ـى ئەم مانگە 12ـەمین فێستیڤاڵی هەنار لە هەڵەبجە دەستپێدەکات.

• ماوەى چوار ڕۆژ بەردەوام بێت و چاوەڕوان دەکرێت هەزاران کەس سەردانى بکەن.

• ئیدارەى پارێزگاکە ئامادەکاریی کردووە.

​بەڕێوەبەرایەتیی هاتووچۆی پارێزگای هەڵەبجە، بە مەبەستی ڕێکخستنی جووڵەی ئۆتۆمبێلەکان، کەمکردنەوەی قەرەباڵغی و ئاسانکاری بۆ سەردانیکەران و گەشتیارانی فێستیڤاڵی هەنار، پلانێکی تایبەت و نەخشەی ڕێڕەوەکانی هاتوچۆی بۆ چوونەژوورەوە و دەرچوون لە شارەکە ڕاگەیاند.

نەخشەی ڕێگاکان و شوێنەکانی وەستان بەمشێوەیە دیاریکراون:

ڕێگاکانی هاتنەژوورەوە (لەسەر نەخشەکە بە هێڵی شین دیاریکراون):

1. شۆفێرانی ئۆتۆمبێلە ئاساییەکان: هاتنەژوورەو لە ڕێگای سەرەکیی (تەپەتۆڵەکە - سیروان) دەستپێدەکات.

2. شۆفێرانی ئۆتۆمبێلە گەورەکان (پاسە گەورەکان) (بە هێڵی مۆر دیاریکراوە): ئەم ئۆتۆمبێلانە ئاڕاستە دەکرێن بەرەو یاریگای نێودەوڵەتیی هەڵەبجە و لەوێ دەوەستن.

3. بۆ ئەم مەبەستەش، ئۆتۆمبێلی گواستنەوەی تایبەت (پاس و مینی ‌پاس) دابینکراوە بۆ گواستنەوەی گەشتیاران لە یاریگاکەوە بۆ ناو فێستیڤاڵەکە.

4. ڕێگاکانی دیکەی هاتنەژوورەوە بۆ ناو شار و پارکی شاری یاریی هەڵەبجە:

5. ڕێگای شەقامی گشتیی بە ئاڕاستەی ڕاستەوڕاست بۆ سەرەوە.

6. ڕێگای پشت یاریگای هەڵەبجە (دەروازەی شار) بە ئاڕاستەی حەسەن ئاوا و پەروەردەی هەڵەبجە.

7. ئاڕاستەی بەنزینخانەی سان لە ڕێگای (40کم) بەرەو مزگەوتی بەختیاری.

8. ڕێگای هەورامان - گوندی عەنەب بەرەو جەلیلە و عەبابەیلێ.

9. ڕێگای پشتی مۆنۆمێنتی هەڵەبجە (گەڕەکی یادگاری) بۆ پشتی گوندی بامۆک.

ڕێگاکانی گەڕانەوە و دەرچوون (بە هێڵی سوور دیاریکراون):

ئاڕاستەکانی دەرچوون بۆ دەرەوەی شار بە هەمان شێوازی هێڵەکانی هاتنەژوورەوە دەبێت.

تێبینییە گرنگەکان بۆ شۆفێران:

• قەدەغەکردنی هاتووچۆ: بە هیچ شێوەیەک ڕێگە بە هاتنەدەرەوەی ئۆتۆمبێل لە ڕێگای سەنتەری شارەوە نادرێت.

• شوێنی وەستان (پارکینگ): گەراجەکانی پارکینگ بۆ ڕاوەستانی ئۆتۆمبێلی گەشتیاران لەسەر نەخشەکە بە هێمای تایبەتی پارکینگ دیاریکراون.

لە کۆتاییدا، بەڕێوەبەرایەتیی هاتوچۆی هەڵەبجە داوا لە سەرجەم شۆفێران و گەشتیاران دەکات پابەندی ڕێنماییەکان و هێماکانی هاتووچۆ بن، بە مەبەستی پاراستنی سەلامەتی گشتی و بەڕێوەچوونی فیستیڤاڵەکە بە سەرکەوتوویی.

لینکى لۆکەیشنەکە:

پووختەى هەواڵەکە:

• فێستیڤاڵی هەنار و پایزى هەڵەبجە 28ـى مانگ دەستپێدەکات.

• لایەنى پەیوەندیدار ژمارەیەک مەرجى بۆ بەشداران و خاوەنکاران داناوە.

• داواى جێبەجێکردنى مەرجەکانى سەلامەتى و پاکوخاوێنى دەکرێت.

لیژنەی هاوبەش و لیژنەکانی قایمقامێتی قەزای مەڵبەندی هەڵەبجە، ژمارەیەک ڕێنمایى بۆ ئەو کەسانەى دەرکرد کە بەنیازن بەشداری لە فێستیڤاڵی هەنار و پایز بکەن.

پێویستە ئەم خاڵانە پەیڕەو بکەن:

• پاکوخاوێنی.

• ​بەکارهێنانی دەستکێش.

• بەکارهێنانی عەلاگەی گەورە بۆ کۆکردنەوەی پاشماوەکان.

• ​بەکارنەهێنانی مەنجەڵی فافۆن، بەتایبەتی بۆ لێنانی شلە.

• دەرهێنانی کارتی تەندروستی.

• پشکنینی پێشوەختە بۆ بەشداربووان بۆ دڵنیابوون لە باری تەندروستی کەسەکە، وەک پشکنینەکانی:

• ​GSE

• ​HES Ag

• ​Anti HCV

• ​Anti HIV (ئایدز)

• ​VDRL

• ​پاکڕاگرتنی ژینگەی پارکەکە.

• بەکارهێنانی مەنجەڵی ستیل (ستەین لێس ستیل) بۆ لێنانی خواردنەکان.

• واباشترە کەوچکی تەختە بەکاربهێنرێت.

• بەکارنەهێنانی لیمەندۆزی لە خواردنەکاندا.

• بەکارهێنانی کڵاو.

• ​هێنانی وەسڵی گۆشت.

لیژنەکان دەڵێن هەرکەسێک پابەند نەبێت بە ڕێنماییەکان بەگوێرەى بڕیاری لیژنەی باڵا کەپرەکەی لێوەردەگیرێتەوە، شوێنەکەی لێدەسەنرێتەوە و سزاش دەدرێت.

پووختەى هەواڵەکە:

• 28ـى مانگ فێستیڤاڵی هەناری هەڵەبجە دەستپێدەکات.

• فێستیڤاڵی ئەمساڵ چوار ڕۆژ بەردەوام دەبێت.

• فێستیڤاڵەکە چەندین چالاکى جۆراوجۆر لە خۆدەگرێت.

لیژنەی باڵای فێستیڤاڵی هەناری هەڵەبجە، بەرنامە و خشتەی چالاکییەکانی فێستیڤاڵەکەی بۆ چوار ڕۆژ بڵاوکردەوە، کە گۆرانى و خەڵاتى جۆراوجۆریشى تێدایە.

ڕۆژی یەکەم - سەرلەبەیانی و پاشنیوەڕۆ

• کاتژمێر 10 خوێندنەوەی چەند ئایەتێک لە قورئانی پیرۆز لەلایەن قورئانخوێنی نێودەوڵەتی م. گۆران مەعروف.

• کاتژمێر 10:05 خولەک وتاری فەرمیی فێستیڤاڵ لەلایەن نوخشە ناسیح پارێزگاری هەڵەبجەوە پێشکەش دەکرێت.

• کاتژمێر 10:10 خولەک ڤیدیۆ ستۆری سەرجەم فێستیڤاڵەکانی کانی دیکە (بە وێنە).

• کاتژمێر 10:15 خولەک نمایشکردنی جلوبەرگی ڕەسەنی هەڵەبجە و ناوچەکە.

• کاتژمێر 10:30 خولەک بە فەرمیی فێستیڤاڵ دەکرێتەوە.

• کاتژمێر 03:00ـى پاشنیوەڕۆ کۆنسێرتی هونەرمەند پەیوند جاف.

ڕۆژی دووەم-پاشنیوەڕۆ

کاتژمێر 03:00ـى پاشنیوەڕۆ کۆنسێرتی کچانی سنە.

ڕۆژی سێیەم -سەرلەبەیانی و پاشنیوەڕۆ

• کاتژمێر 10:00 کۆنسێرتی گۆرانی منداڵان لەلایەن چالاکی قوتابخانەکانەوە.

• کاتژمێر 03:00ـى پاشنیوەڕۆ کۆنسێرتی هونەرمەند پێشڕەو هەورامی.

ڕۆژی چوارەم -پاشنیوەڕۆ

• دابەشکردنی خەڵاتەکان بەسەر بەشداربوواندا:

• خەڵاتی گەورەترین هەنار.

• خەڵاتی پاکوخاوێنترین کەپر (خواردەمەنی).

• خەڵاتی ڕازاوەترین خاوەن کەپر (هەنار - کاری دەستی).

• خەڵاتی جوانترین وێنەی فێستیڤاڵ.

فێستیڤاڵى هەنارى هەڵەبجە، یەکێکە لە گەورەترین فێستیڤاڵەکان و وەک بۆنەیەکى گەشتیارى و بازرگانى ساڵانە هەزاران کەس سەردانى دەکەن.