پووختەى هەواڵەکە

• بەرپرسانى هەرێمى کوردستان ڕەشنووسى بودجەیان بە دڵ نییە.

• ناکۆکى و جیاوازى لە تێڕوانینى هەولێر و بەغداد بۆ پڕۆژەیاساى بودجە هەیە.

• لە ڕەشنووسى بودجەدا ژمارەیەک پابەندى قورس بۆ هەرێمى کوردستان دیاریکراون.

زانیاریى بە کەناڵ8 گەیشت، کە ئەمڕۆ ئەنجوومەنى وەزیرانى کاربەڕێکەرى هەرێمى کوردستان گفتوگۆ لەسەر ئەنجامى دوایین کۆبوونەوەى شاندى دانوستانکار لە بەغداد دەکات و ئەنجامى کۆبوونەوەکەى دهۆکی نێوان شاندى هەولێر و بەغدادیش دەخرێتەڕوو.

کارنامەى کۆبوونەوەى ئەنجوومەنى وەزیران:

• لە بڕگەى یەکەم، گفتوگۆ لەسەر ئەنجامى دوا کۆبوونەوەى شاندى دانوستانکارى هەرێمى کوردستان لەگەڵ وەزارەتى دارایی فیدراڵ لە ڕۆژى 24ـى ئەم مانگە تایبەت بە بڕگە پێشنیازکراوەکانى ماددەى دەى ڕەشنووسى بودجە دەکرێت.

• ئەندامانى شاندى دانوستانکار ئەنجامى کۆبوونەوەکە دەخەنە بەردەم ئەنجوومەنى وەزیران.

• لە بڕگەى دووەمدا، ئەنجامى سەردانى شاندى باڵاى حکومەتى فیدراڵ بەسەرۆکایەتیى جێگرى سەرۆکوەزیران بۆ کاروبارى وزە و ئەندامێتیى وەزیرانى نەوت و کارەبا بۆ هەرێمى کوردستان لە ڕۆژى 25ـى ئەم مانگە سەبارەت بە دۆسییەکانى نەوت و وزە لە چوارچێوەى ڕەشنووسى پرۆژەیاساى بودجەى فیدراڵى دەخرێتەڕوو.

ڕەشنووسى بودجەى گشتیى عێراق لە ئەنجوومەنى وەزیرانەوە گەڕێنراوەتەوە و بۆ وەزارەتى دارایی فیدراڵ، ئەوەش بە مەبەستى تەرخانکردنى دارایى بۆ ئەو وەزارەتانەى زیادکراون، هەرێمى کوردستان دەیەوێت لەم قۆناغەدا گۆڕانکاریش لە ماددەى 10 بکرێت.

زانیاریى زیاتر بۆ تۆ:

کەناڵ8 زانیاریی لەبارەی کۆبوونەوەی شاندی عێراق و هەرێمى کوردستان ئاشکرا دەکات

پڕۆژەیاساى بودجە؛ گرێ کوێرەکەى نێوان هەولێر و بەغداد