سەرۆکى دیوانى پەرلەمانى کوردستان: بانگەوازی کۆبوونەوەی پەرلەمان هیچ پەیوەندى بە ئێمەوە نییە
پووختەی هەواڵەکە
دیوانی سەرۆکایەتیی پەرلەمان ڕوونکردنەوەیەکی لەسەر بانگێشتنامەی کۆبوونەوەی پەرلەمانتاران بڵاوکردەوە.
دیوانی پەرلەمانی کوردستان دەڵێت، ئەو بانگێشتنامەیەی ئاڕاستەی پەرلەمانتاران کراوە دوور و نزیک پەیوەندی بە ئێمەوە نییە.
دیوانی پەرلەمانی کوردستان ڕاشیگەیاندووە، تەنیا 43 پەرلەمانتار واژۆی ئەنجامدانی دانیشتنیان کردووە.
سەرۆکایەتی دیوانی پەرلەمانی کوردستان لە نوسراوێکیدا کە واژۆی ئەردەلان محەمەد سەرسپی، سەرۆکی دیوانی پەرلەمانی کوردستان لەسەرە ، ڕایگەیاندووە، ئەو بانگێشتنامەیەکی لە سایتى پەرلەمان بڵاوکراوەتەوە هیچ پەیوەندى بە ئێمەوە نییە".
سەرۆکایەتی دیوانی پەرلەمانی کوردستان:
بە پێویستی دەزانین ڕای گشتی ئاگاداربکەینەوە کە ئەم بانگهێشتنامەیە دوور و نزیک پەیوەندی بە ئێمەوە نییە.
هیچ کەس و لایەنێکمان ڕانەسپاردووە بۆ ئەم ئەرکە.
تا ئێستا ڕێژەی یاسایی بۆ دانیشتنی ئەندامانی پەرلەمان کە (٥٠+١)ـە بە فەرمی بەدەست ئێمە نەگەیشتووە.
تەنیا واژۆی (٤٣) ئەندامی پەرلەمان بە فەرمی بە ئێمە گەیشتووە.
لە کاتێکدا ئێمە لە دەوامی فەرمی ئاسایی خۆمانین، هەر کاتێکیش ئەو ڕێژە یاساییە بەردەست بوو، هۆڵی پەرلەمان ئامادەیە و کراوەیە.
ئەمەش لە کاتێکدایە فراكسیۆنەکانى پارتى، سۆسیالیست و توركمان و كلدان ئاشوورى داوایان کرد چوارشەممە دانیشتنى تەواوکارى یەکەم دانیشتنى پەرلەمان بکرێت. دواتریش نوسراوێک لە ناوی دیوانی پەرلەمانەوە بڵاوکرایەوە و کە دوالە پەرلەمانتاران کرابوو سبەی بۆ کۆبوونەوەی پەرلەمان ئامادەبن .
بە گوێرەی زانیارییەکانیش ئەگەر دانیشتنیش بکرێت ، فراكسیۆنەکانی یەكێتی، نەوەی نوێ و یەكگرتوو، فراکسیۆنێکى تورکمان و فراکسیۆنێکى کریستیان بەشداریى دانیشتنەکە ناکەن.
