پووختەى هەواڵەکە

• کاردانەوەى بڕیارەکەى دادگای کارگێڕیی سلێمانی بەردەوامە.

• دواى دادگای تێهەڵچوونەوەی سلێمانى، بەڕێوەبەرایەتیی وەبەرهێنانیش هاتە دەنگ.

• تاپۆکردنى شوقە و خانوو لەسەر هاوڵاتییانى عەرەب و بیانى مشتومڕى لەسەرە.

بەڕێوەبەرایەتیی گشتیی وەبەرهێنانی سلێمانی لە ڕوونکردنەوەیەکدا ئاماژەى بەوەکردووە، بڕیارەکەى دادگای کارگێڕیی سلێمانی لە هەندێک دەزگای ڕاگەیاندن و تۆڕە کۆمەڵایەتییەکان بە هەڵە یان بە ئاڕاستەی جیاواز لێکدانەوەی بۆ کراوە و هیچ گۆڕانکارییەک لە خاوەندارێتى شوقە و خانوو نەکراوە.

بەڕێوەبەرایەتیی گشتیی وەبەرهێنانی سلێمانی:

• ژینگەی وەبەرهێنان، مامەڵەی کڕین و فروشتنی یەکەکانی نیشتەجێبوون و یاساکانی وەبەرهێنان لە پارێزگای سلێمانی وەک خۆیان جێبەجێ دەکرێن.

• هیچ گۆڕانکارییەک لە مافی خاوەندارێتیی یاسایی دروست نەبووە.

• بەگوێرەى دەستووری عێراق و یاسای تۆمارکردنی خانووبەرە و یاسای وەبەرهێنان، تەواوی هاوڵاتییانی ناوچەکانی دیکەى عێراق بەبێ جیاکاری مافی یاسایی تەواویان هەیە بۆ خاوەندارێتیی کڕینی شوقە، خانوو و یەکەکانی نیشتەجێبوون لە پرۆژەکانی وەبەرهێنان لە شاری سلێمانی.

• وەک دادگای تێهەڵچوونەوەی سلێمانی ڕوونی کردووەتەوە، بڕیاری ئاماژەپێکراو تەنیا تاوتوێی حاڵەتێکی تایبەتی کردووە لە ڕووی تایبەتمەندێتییەوە بڕیاری کۆتایی وەرنەگرتووە.

• دڵنیایی تەواو دەدەینە تەواوی وەبەرهێنەران، کۆمپانیاکان و کڕیارانی یەکەکانی نیشتەجێبوون کە سلێمانی وەک هەمیشە شارێکی کراوە، ئارام و پڕ لە دەرفەتی وەبەرهێنانە بۆ هەمووان.

• سەرجەم مافە یاسایی و داراییەکانی وەبەرهێنەران و هاوڵاتیان بەگوێرەى یاسا بەرکارەکان پارێزراون.

ئەوەش دواى ئەوە هات بڕیارێکى دادگاى کارگێڕیى سلێمانى بڵاوکرایەوە کە تێیدا هاتبوو "لە مەودوا خانو و شوقە و موڵک ناکرێت بەناوى عەرەب و بیانییەوە، ئەوەش لەپێناو پاراستن و ڕێگریکردن لە شێواندنى دیمۆگرافیاى کوردستان". بەڵام دادگاى تێهەڵچوونەوەى سلێمانى بڕیارەکە ڕەتکردەوە.

زانیاریى زیاتر بۆ تۆ:

دادگاى کارگێڕیى سلێمانى: لەمەودوا خانو و شوقە و موڵک ناکرێت بەناوى عەرەب و بیانییەوە

دادگاى تێهەڵچوونەوەى سلێمانى: هاوڵاتیانى عێراقى دەتوانن خانوو شوقە بکەن بە ناوى خۆیانەوە