
ئەمڕۆ دادگاییکردنی خورشید هەرکی، حەیدەر هەرکی و نێچیروان هەرکی و سێ کەسی دیکە بەڕێوەچوو.
خورشید هەرکی و حەیدەری برای لەگەڵ سێ کەسی دیکە بەماددەی 3ـی تیرۆر دادگایی دەکرێن.
یەکێک لە گیراوەکان بەرپرسی کۆمیتەی پێشووی یەکێتییە لە خەبات.
ئەمڕۆ دووشەممە، 16ـى تشرینى یەکەمى 2026، دادگاییکردنی خورشید هەرکی، حەیدەر هەرکی و نێچیروان هەرکی و چەند کەسێکی دیکە بەڕێوەچووە و بە گوێرەی زانیارییەکان، دادگاى هەولێر بە ماددەى 3ـی تیرۆر دۆسییەى بۆ کردوونەتەوە کە سزاکەیان لە نێوان پێنج ساڵ بۆ زیندانی هەتاهەتاییدایە و دانیشتنەکەش دواخراوە بۆ کاتیکی نادیار.
ئەمڕۆ لە سەرۆکایەتیی دادگای تێهەڵچوونەوەی ناوچەی هەولێر، دادگایی خورشید هەرکی، حەیدەر هەرکی کە بران، لەگەڵ نێچیروان هەرکی کە بەرپرسی کۆمیتەی خەباتى یەکێتیی بووە بەڕێوەچوو.
غازی هەرکی، کەبیر هەرکی دوو کەسی دیکەبوون کە لەگەڵ تۆمەتباران لە دادگا ئامادەبوون.
کەناڵ8 زانیویەتی، هەر پێنجیان بە گوێرەی ماددەی سێی تیرۆر دۆسییەیان بۆ کراوەتەوە.
لە کۆتایی ساڵى ڕابردوو هاونیشتمانیانى گوندى لاجان بەهۆى کەمى خزمەتگوزارى خۆپیشاندانیان ئەنجامدا و داواى هەلى کار و دابینکردنى خزمەتگوزارییان کرد.
بەڵام هێزە ئەمنییەکانى پارتى هێرشیانکردە سەر خۆپیشاندەران و گرژى و ناکۆکى درووستبوو، بەوهۆیەوە ژمارەیەک خۆپیشاندەر برینداربوون و دوو کەسیش گیانیان لەدەستدا.
دواتر هێزە ئەمنییەکان خەڵکى گوندى لاجانیان لەماڵەکانیان دەرکرد و دەستیان کرد بە پشکنینى سەرجەم ماڵەکان، بە بیانوى بونى چەکى نایاسایی.
ئەمەش نیگەرانى لاى خەڵکى سنوورەکە درووستکرد و خۆپیشاندانەکان فراوانبوو، بەوهۆیەوە هێزى ئەمنى بەتەواوى لەو سنوورانەى خۆپیشاندان هەبوو بڵاوەیان پێکرا.
سەرەنجام ژمارەیەک خۆپیشاندەر دەستگیرکران و ئەمڕۆش بە ماددەی 3ـی تیرۆر دۆسییەیان بۆ کراوەتەوە.
کۆبوونەوەکەى ئەمڕۆى دادگا بە ئامادەیی خورشید و حەیدەر هەرکی و سێ کەسەکەی دیکە بەڕێوەچووە و دۆخی تەندروستییان باش بووە و نۆرەی ئەوان نەبووە کە قسەبکەن.
بەگوێرەی زانیارییەکان ئەمڕۆ لە دادگاییەکەدا سکاڵاکاران و نوێنەری ئەو فەرمانگانەی کە زیانیان بەرکەوتبوو لەکاتی گرژییەکاندا وتەى خۆیان پێشکەشکرد، ئەوان باسیان لە زیانەکانیان و سوتانی فەرمانگەکانیان کرد، کە لەکاتى بەڕێوەچوونى خۆپیشاندانەکان ڕوویاندا.
نوێنەرى ئەو فەرمانگانەى ئامادەی دانیشتنەکە بوون بریتیبوون لە پەروەردە، تەندروستی، وەرزش و لاوان، فەرمانگەی کارتی نیشتنمانی، پۆلیس، وێستگەی قەپانی سەربە وەزارەتی ئاوەدانکردنەوە و شارەوانی لە قەزاى خەبات بوون.
بەگوێرەی زانیارییەکان هەرچەندە دەبێت لەناو دانیشتنەکەدا وادەی دانیشتنی داهاتوو دیاریبکرێت، بەڵام وادەکە دیارنەکراوە و دواخراوە و بڕیارە سبەی وادەیەک بۆ دانیشتنی داهاتوو دیاری بکرێت.