ئاسایشی هەولێر ئەو قاچاخچییەی دەستگیرکرد کە بووە هۆکاری خنکانی سێ منداڵەکەی سلێمانی
پووختەی هەواڵەکە
بەرێوەبەرایەتیی ئاسایشی هەولێر دەستگیرکردنی قاچاخچییەکی کوردی نێودەوڵەتی ڕاگەیاند.
ئاسایشی هەولێر دەڵێت، ئەو قاچاخچییە بووەتە هۆکاری گیان لەدەستدانی سێ منداڵى خێزانەکەى شارى سلێمانى لە ئاوەکانی نێوان تورکیا و یۆنان.
بەڕێوەبەرایەتی ئاسایشی هەولێر لە ڕاگەیێنراوێکدا بڵاویکردەوە، ئەو قاچاخچییەیان دەستگیرکردووە، کە بووە هۆکاری گیانلەدەستدانی سێ منداڵ کە لەگەڵ دایک و باوکیان بەمەبەستی چوونە یەکێک لە وڵاتانی ئەوروپا ڕۆژی 14ـی تشرینی یەکەمی 2026 لە ئاوەکانی نێوان تورکیا و یۆنان خنکان.
بەرێوەبەرایەتیی ئاسایشى هەولێر:
پاش کۆکردنەوەی زانیاری و بەدواداچوون، ناسنامەی قاچاخچییەکە ئاشکرا کراوە.
لە ئۆپراسیۆنێکدا توانیمان دەستگیرى بکەین.
قاچاخچییەکە لە کاتی گەڕانەوەی بۆ هەرێمی کوردستان و بە بڕیاری دادوەری لێکۆڵینەوەی ئاسایشی هەولێر، لەلایەن هێزەکانیانەوە دەستگیر کراوە.
ئەو قاچاخچییە بووەتە هۆکاری گیان لەدەستدانی سێ منداڵەکە، بە ناوەکانی هەستیار ، هەریاد و مێلا، کە تەنیا توانراوە تەرمی دووانیان بدرۆزرێتەوە و تاوەکو ئێستاش تەرمی هەستیاری 12 ساڵ لە ئاوەکاندا ماوە و نەدۆزراوەتەوە.
ڕۆژى 14ـى ئەم مانگە بەلەمێکى کۆچبەران بە هەشت سەرنشینەوە کە پێنجیان ئەندامى یەک خێزان بوون، نقومبوو، سێ منداڵى ئەو خێزانە خنکان و دایک و باوکیان و سێ سەرنشینى دیکەى بەلەمەکە ڕزگاریان بوو.
ڕۆژى 16ـی مانگ، تەرمى یەکێک لە منداڵەکان بە ناوی هەریاد دۆزرایەوە و ڕۆژی 17ـی مانگیش تەرمى دووەم بەناوى مێلا دۆزرایەوە، بەڵام تاوەکو ئێستا سەرەڕای تێپەڕبوونی 14 ڕۆژ، تەرمی هەستیار نەدۆزراوەتەوە.
