
" مەرج نییە دەستبەجێ دوای دووگیانبوون خانمەکە دەست بکات بە وەرگرتنی تەواوکەرییە خۆراکییەکان"
" لە سێ مانگی کۆتایی دووگیانیدا، جەستە پێویستی بە بڕێکی باش لە ئۆمێگا سێ هەیە"
پزیشکێکی پسپۆڕی نەخۆشییەکانی ژنان و منداڵبوون، سەبارەت بە تەواوکاری خۆراکی لە ماوەی دووگیانیدا چەند ڕێنوێنییەک بڵاو دەکاتەوە.
د.زاریا شیروان پزیشکی پسپۆڕی نەخۆشییەکانی ژنان و منداڵبوون، دەڵێت '' کاتێک کۆرپەلە دەست بە گەشەکردن دەکات و ئەندامەکانی جەستەی بۆ دروست دەبێت، جەستەی خانمەکە پێویستی بە بڕێکی زۆر لە پێکهاتەی فۆلیک ئەسیدە، سپێناخ کەلەرم، بڕۆکۆلی، میوەکان و پاقلەمەنییەکان دەوڵەمەندن بە پێکهاتەی فۆلیک ئەسید".
لە سێ مانگی دووەمی دووگیانیدا ئێسکەکانی کۆرپەلە دەست بە ڕەقبوون دەکەن، لە ئەم کاتەدا جەستەی خانمەکە پێویستی بە پێکهاتەی ئاسن و کالیسیۆم دەبێت.
شیرەمەنی، کونجی، بادەم و سەوزە دەوڵەمەندن بە پێکهاتەی کالیسیۆم.
گۆشت، چەرەسات، میوەکان بەتایبەت قەیسی و پاقلەمەنییەکاندا دەوڵەمەندن بە پێکهاتەی ئاسن.
لە ئەم کاتەدا گەشەی کۆرپەلە خێراتر دەبێت بەتایبەت دەمارەخانەکان و مێشکی کۆرپەلە، جەستە پێویستی بە بڕێکی باش لە ئۆمێگا سێ هەیە کە لە ماسی، گوێز و هێلکەدا هەیە.
پزیشکە پسپۆڕەکە دەڵێت " ئەگەر خانمی دووگیان نەیتوانی ژەمە خۆراکیی هاوسەنگ و تەندروست ئامادە بکات، دەتوانێت لە ژێر چاودێریی پزیشکی پسپۆڕدا تەواوکارییە خۆراکییەکان بەکار بهێنێت".
بۆ دەستکەوتنی زانیاریی زیاتر دەتوانن سەردانی ئەم لینکەی خوارەوە بکەن.
د. سومەییە نەقشبەندی: خواردنی جگەر لە ماوەی دووگیانیدا زیان بە مێشکی کۆرپەلە دەگەیێنێت | CHANNEL8

