وەزیری دەرەوەی ئێران: پلانی گفتوگۆمان لەگەڵ ئەمریکادا نییە
پووختەی هەواڵە
وەزیری درەوەی ئێران دەڵێت، پلانی دانوستانیان لەگەڵ ئەمریکا نییە بۆ هەموو سیناریۆیەک ئامادەن.
عێراقچی دەشڵێت، پەیامەکەی جەی دی ڤانس لە کۆبوونەوەی باڵادا گفتوگۆی لەسەر کراوە.
عێراقچی ڕاشیگەیاند، پێشنیازی نێوەندگیرەکان بۆ پرسی ئەتۆمی لەژێر لێکۆڵینەوەدایە
عێراقچی: پێشنیازەکەی ئێران بۆ کردنەوەی گەرووی هوورمز تاکە پێشنیازە.
عێراقچی لە دیمانەیەکیدا لەگەڵ میدیایەکی عەرەبی، ڕەتیکردەوە هیچ پلانێکیان هەبێت بۆ کۆبوونەوە لەگەڵ بەرپرسانی ئەمریکا و ڕاپۆرتەکانی لەمبارەیەوە بە گریمانەی میدیایی پووچەڵ ناوبرد.
وەزیری دەرەوەی ئێران:
وڵاتەکەمان بۆ ئێستا هیچ پێویستییەک بۆ کۆبوونەوە لەگەڵ لایەنی ئەمریکیدا نابینێت و مەرجەکانی ئێران ڕوونن.
تاران تەنیا دوای ڕەزامەندیی واشنتن لەسەر مەرجە پێشنیازکراوەکانی، بڕیار دەدات کە ئایا دانوستانەکان ڕاستەوخۆ یان ناڕاستەوخۆ بەڕێوەدەچن.
تاران هیچ ئەگەرێکی هەڵگیرساندنەوەی جەنگ ڕەتناکاتەوە و بۆ هەموو سیناریۆیەکیش ئامادەیە.
عێراقچی هەوڵەکانی ئەمریکای بۆ کردنەوەی دەرگای دایالۆگ بە هەنگاوێکی ئەرێنی ناوبرد و پشتڕاستی کردەوە، تاران پێداچوونەوەی بۆ ئەو پەیامە کردووە کە لەلایەن جەی دی ڤانس، جێگری سەرۆکی ئەمریکاوە پێی گەیشتووە و لە کۆبوونەوەی ئاست بەرزدا گفتوگۆی لەسەر کراوە.
وەزیری دەرەوەی ئێران هۆشداری دا:
ئەگەر مەبەستی واشنتن لە ناردنی پەیامەکەی ڤانس دروستکردنی ناکۆکی بێت، ئەوا ئەمە هەڵەیەکی دیکە دەبێت بۆ سەر هەڵەکانی پێشووی.
شاندێکی ئێران گەشتی بۆ دەوحەی پایتەختی قەتەر کردووە.
نێوەندگیرانی قەتەر و پاکستان، بەردەوامن لە هەوڵ و ڕاوێژکارییەکانیان سەبارەت بە مەرجەکانی ئێران.
پێشنیازەکەی ئێران تاکە پێشنیازە کە ئێستا لەسەر مێزی گفتوگۆیە بۆ کردنەوەی گەرووی هوورمز ئامادە کراوە.
لایەنی قەتەری پێشتر پێشنیازی کەمکردنەوەی ماوەی جێبەجێکردنی پێشنیازە حەوت ڕۆژییەکەی بۆ پێنج ڕۆژ کردبوو و دواتریش داوای کردووە لە دوو ڕۆژدا جێبەجێ بکرێت.
زانیاریی زیاتر بۆ تۆ
